Халықаралық жарыстың жеңімпазы

Шағандық Әлия Ерболқызы ән әлеміне құштар. 2012 жылы дүние келген жас өнерпаз бүгінде түр­лі байқауларда топ жарып жүр. Жақында ғана ха­лықаралық байқаудың жеңімпазы атанған ол өне­рімен көпшілікке танылып келеді.

Жас әнші Әлия Медет – Шаған ауылдық мәдениет үйі жанындағы ән үйірмесінің белсенді мүшесі. Оның өмірдегі, өнердегі басты ұстазы – әкесі Ербол Медет. «Ұстаздан шәкірт озар» демекші, кішкентай Әлияның бүгінде бағындырған белесі көп. Талапты жастың талабын ауыл тұрғындары да жоғары бағалайды.
– Әлия алғашқы кездері ауыл көлеміндегі концерттерде ән шырқап жүрді. Бүгінде аудандық, облыстық және халықаралық байқау­ларда өнер көрсетіп келеді. Қазір музыкадан дәріс алуда. Болашақта үлкен сахналарда ән шырқап, жұртшылықтың ыстық ықыласына бөленеді деп сенемін, – дейді Ербол Медет.
Талантты өнерпаз Алматы қаласында ұйымдастырылған «Ғұмырдария» байқауының бас жүлдесін, «Алмалы.кз» байқауының І орнын және Шымкентте өткен «Дарынды бала» конкурсының І орнын иеленген. Ол жақында Украинада өткен «Талантты өлке» халықаралық байқауының қорытындысында жүлделі І орынды жеңіп алды. Ауылдағы №37 мектеп-лицейінің өнерлі оқушысымен ұстаздары да мақтанады. Ауыл абыройы мен мектептің мәртебесін арттырып жүрген жас өнерпазға сәттілік тілейміз.

М.ҚОЖАБАЙ