АТА КӘСІПТІ ДАМЫТУ МАҢЫЗДЫ

Ауданның ауыл шаруашылығы саласында ұзақ жыл­дан бері еңбек етіп келемін. Өзім басқарып отыр­ған шаруашылық егін шаруашылығымен қатар мал шаруашылығымен де айналысады. Ірі қара малдың тілін тауып, ет-сүт бағытында өнім алу біздің байырғы кәсібіміз. «Мал баққанға бітеді» демекші, тынымсыз еңбек қана өнімді арттырады. Ол үшін соңғы технология­мен жабдықталған заманауи құрал-жабдықтар қажет. Бұл өз кезегінде мал азығының құнарлығын қадағалауға мүмкіндік береді.

Жыл сайын қарт Қаратаудың баурайында өтетін малшылар слетіне қатысып, биыл марапат төріне шықтық. Бұл әрине, бір адамның ғана еңбегі емес, осы саланы өркендетіп отырған серіктестік еңбеккерлерінің жемісті еңбегінің арқасы. Екі күнге жалғасқан слетте мамандар өзара тәжірибе алмасып, ғалымдар пікірі тыңдалды. Аймақтың маңдайалды малшылары бас қосқан мерекеде ой сергітіп, бой жаздық. Дәстүрлі мерекенің сән салтанаты өте әсерлі өтіп, алдағы жұмысымызға тың бағыт берді.

Марат БИСЕНОВ,

«Ақжарма-2» ШҚ төрағасы