Үлгілі үрдіс жалғасын табуда
Аудандық газетке қолдау көрсетіп, басылымға жазылуға шамасы келмейтін еңбек ардагерлерін 2025 жылдың І жартыжылдығына аудандық газетке тегін жаздырып беру жұмыстары қарқынды жүргізілуде. «Бітер істің басына, жақсы келер қасына» демекші, демеушілік қолдау көрсетушілер қатары да баршылық. Яғни демеушілік жасауға ниетті адам арнайы шотқа қаржы аударады, редакция қызметкерлері ұсынылған тізім бойынша газетке жазылуға шамасы келмейтін ардагерлерге басылымды тегін жазып, апарып береді.Осы орайда биылғы газетке жазылу науқанында жомарт жүректі жандардың ықпалымен, көптеген еңбек ардагерлері келер жылдың алты айында аудан жаңалықтарын оқитын болады. Жалпылай айтқанда бұл да қайырымдылыққа жатады. Ал газеттің сөзі мың жылдық екенін ескерсек, бұл газетті әр адам оқып, жаңа нәрсені ұққан сайын қайырымдылық жасаушыға сауабы жазылып тұратын болады.
Аудандық басылымды құрметтеп, жазылу науқанында демеушілік көрсеткен біршама қолдаушыларды өткен газеттерде айтып өттік. «Жақсының жақсылығын айт, нұры тасысын» дейді халық даналығы. Осы орайда Сыр өңірі мен Сырдария ауданының әлеуметтік-экономикалық, қоғамдық-саяси, рухани-мәдени дамуына айрықша үлес қосқан ардақты азамат, «Құрмет белгісі» орденінің иегері, Сырдария ауданының Құрметті азаматы Абызбай Маханбетовтің ұрпақтары жыл сайын аудандық газетке ерекше қолдау көрсетіп келеді. Биылғы жылы да үлгілі үрдіс өз жалғасын тауып, Абызбай ағайдың ұлы Ғалым Абызбаев «Ком-Мұнай» компаниясының атынан 50, жеке өз атынан 20 ардагерді аудандық газетке жаздырып берді. Абызбай Маханбетовтің есімі редакция үшін елеулі әрі құрметті. Олай дейтін себебіміз, Абызбай ағай партия органдарында, сонымен қатар аудандық газетте бас редактор болып ұзақ жыл қызмет істеген. Аудан жаршысының халыққа уақытылы жетіп, сапалы шығуына, газеттің бүгінгі келбетінің қалыптасуына қиын кезеңдерде үлес қосқан. Бүгінде арда азаматтың ұрпақтары аудандық газет редакциясының ұжымымен ұдайы байланыс орнатып, басылымға тұрақты түрде қолдау көрсетіп келеді.
Сонымен қатар Қызылорда қаласындағы «Қор-Мұнай» компаниясы акционерлік қоғамы да аудандық газетке жыл сайын тұрақты түрде қолдау көрсетіп келеді. Компания директоры Дәулет Дәукенұлы – басылым жанашыры. Игі істің басы-қасынан табылатын арда азамат 50 газетті аудан ардагерлерінің мекенжайына бір жыл мерзімге тегін жаздырып берді. Үлгілі үрдіс бұдан кейінгі уақытта да өз жалғасын табатынына сенім кәміл. Биыл құрылғанына 30 жыл толып отырған «Қор-Мұнай» компаниясы шикі мұнайды және ілеспе газды өндіру жұмыстарын жүргізетінін айта кету орынды.
«Газет – халықтың көзі, құлағы һәм тілі». Бұл аталы сөз әлі күнге өз маңызы мен мәнін жойған жоқ. Басылым мен оқырман барда даналық сөз өз құнын жоймақ емес. Ал халық пен тіл барда баспасөз жойылмайтыны бесенеден белгілі. Газет ойлы оқырманымен құнды. Журналистер қауымы сапалы мақала жазып, пайдалы ақпарат таратуда жұмысты жандандыра береді.
А.МҰХАНБЕТҚАЛИ
