Тіршілік тынысы Tirshilik-tynysy.kz ақпараттық агенттігі
» » » Жергілікті газетке жазылуға шақырамыз

Жергілікті газетке жазылуға шақырамыз

Дәл қазір 2022 жылдың екінші жарты­жыл­дығына баспасөзге жазылу жұмыстары жүргізілуде. Аудандық газеттің тұрақты оқыр­мандары да жергілікті газетке жазылып, аудан жаңалықтарының жаршысы саналатын басылымға қолдау көрсетуде. Осы ретте игі іске үлес қосып, 30 еңбек ардагерінің мекен жайына «Тіршілік тынысы» газетін жаздырып берген облыстық мәслихат депутаты, «Сырдария ауданының Құрметті азаматы» Расул Есеновке алғыс айтамыз.

Ұлт ұстазы Ахмет Байтұрсынұлы «Газет – ха­лықтың көзі, құлағы һәм тілі» деп басталатын мақаласын «...адамға көз, құлақ, тіл қаншалықты ке­рек болса, халыққа да газет соншалықты керек. Газеті жоқ жұрт басқа газеті бар жұрттардың қасында құлағы жоқ керең, тілі жоқ мылқау, көзі жоқ соқыр секілді» деп түйіндейді. Осыдан-ақ қо­ғамның тыныс-тіршілігінде мерзімді басылымның алатын орны ерекше екенін ұғынуға болады.

Қазақ баспасөзін қолдаушылардың демеуі мен шығармашылық ұжымның ашықтыққа негіз­делген жұмысының нәтижесінде соңғы жылдары газетіміздің таралымы көбейді. Біз оқырман саны­ның артуын жақсылыққа балап, алдағы жұ­мыс­тарымызды қоғам мүшелерінің игілігіне бағыт­тайтын боламыз. Қазірдің өзінде аудандық газетте оқырман сұранысына сәйкес арнайы айдарлар ашылып, тұрақты түрде ақпараттық мақалалар жариялануда. Шығармашылық топ мүшелерінің айлық жос­­пары да оқырмандардың ұсыныс-пікірі негізінде бекітілуде. Аудандық газет ұжымы оқырмандармен тығыз қарым-қатынас жасап, әріптестік байланыс орнатуды жолға қойды деп айтуға негіз бар. Бұл басылым таралымының артуына басты негіз болады деп сенеміз.

Баспасөзге жазылу науқанында басылымның тұрақты оқырмандары ерекше белсенділік таны­туда. Мамыр айының басынан бастап 2022 жыл­дың ІІ жартыжылдығына аудандық газетке жазы­лушылар көбейді. Олардың ішінде көр­шілес ауданның тұрғындары да бар. Олар біз­дің аудандық газеттің жаңалықтарын электронды сайтымыздан көріп, оқып, енді қағаз түріндегі нұсқасын қолға ұстап оқымақ ниетте. Атап өту керек, редакция бастамасымен еңбек ардагерлері, көпбалалы аналар, мүмкіндігі шектеулі азаматтар аудандық газетке демеушілер көмегімен жазылуда. Тағы да бір айта кететін жайт, «Сыр медиа» серіктестігіне қарасты Сырдария аудандық «Тіршілік тынысы» газеті редакциясы баспасөзге жазылу науқаны барысында оқырмандар үшін жаңа мүмкіндік жасауды қолға алды. Егер, Сіз аудан­­дық газетке жазылғыңыз келсе, жұмыстан немесе басқа да жағдайлардан редакцияға келуге қолыңыз тимесе, онда редакцияның баспасөз мама­нына хабарлассаңыз, маманның өзі түбіртек толтыру үшін мекен жайыңызға барады. Бұл сіздің уақытыңызды үнемдейді әрі келіп-кету шы­ғы­ны­ңызды қысқартуымен де тиімді. Ол үшін 8-777-155-94-53, 21-5-73 телефон нөміріне хабар­ласуыңыз қажет. Жоғарыда айтылғандай, аудандық газетке Қызылорда қаласымен бірге көршілес Арал, Қазалы, Қармақшы, Жалағаш, Шиелі, Жаңақорған аудандарының тұрғындары да жазыла алады. Олардың мекен жайына басылым аптасына екі рет барады.

Баспасөзге жазылу барысында қолдау көрсетуші барлық азаматқа алғыс айтамыз. Біздің қызметіміз – оқырман үшін. Оқырманнан ұсыныс түссе, сол та­қырыпта шығармашылық топ мүшелері қалам тербеуге дайын. Сондықтан оқырмандарды бірлесе еңбек етуге шақырамыз. Біз біргеміз!








А.ҚҰРМАНАЙТЕГІ
04 мамыр 2022 ж. 824 0