Төл газетке түгел жазылған – кітапханашылар

Басылымның қолдаушысы да, тірегі де, іздеушісі де тұрақты оқырман екені сөзсіз. 2025 жылдың алғашқы жартыжылдығына баспасөзге жазылу науқаны жүріп жатқаны мәлім. Баспасөз айдынында өзіндік орны бар аудан айнасының бүгінде тұрақты оқырманының саны артуда. Осы орайда, мемлекеттік мекемелер тұрақты түрде 85 жылдық тарихы бар «Тіршілік тынысы» газетіне жазылуды үлгілі үрдіске айналдырған.

Өз кезегінде Айбек Қонысбаев басшылық ететін Сырдария аудан­дық орталықтандырылған кітап­ханасының ұжымын айта кеткен жөн. Бүгінде аудан тарихында жақсы бастамаға, жарқын болашаққа жол ашатын рухани қазына ордасы орталықтандырылған кітапхананың ұжымы және ауылдық округтердегі кітапхананың қызметкерлері аудан­дық «Тіршілік тынысы» газетіне, сондай-ақ «Сыр бойы», «Кызылординские вести», «Ақмешіт жастары», «Халық» газеттеріне жазылып, межені 100 пайызға орындап, науқанға белсенді атсалысып келеді.

– «Өзі – бір күндік, сөзі – мың күндік» болған, 85 жылдан бері Сырдария ауданының шежіресіне айналған «Тіршілік тынысы» газетінің біздің ұжым үшін орны ерекше. Аудандық газет арқылы еліміздегі, оның ішіндегі аудандағы, ауылдардағы болып жат­қан жаңалықтарды ең бірінші болып оқимыз. Бүгінде жаңа айдарлармен толыққан газеттің де көзіқарақты оқырмандары жетерлік. Әркез жа­ңа­лық жаршысына айналған, ауданның тарихын қаттап жатқан басылымның тұрақты оқырманы болу – біз үшін үлкен абырой, – дейді кітапхана директоры Айбек Қонысбаев.

Қазіргі таңда ауданда 17 кітапхана жүйесі жұмыс жасайды. Сондай-ақ білім ошақтарында 17 кітапхана бар. Бүгінде кітапханалар жүйесінде 400 мыңнан астам кітап қоры қамтылған. Кітапхана – білім көзі болса, ал кітапханашы – оның тірегі екені сөзсіз. Тек қана оқырманға кітап беріп қоймай, кітапхананың бай қорын сақтап және насихаттап, халыққа жеткізуде 50-ден астам кітапханашы аянбай қызмет етіп келеді. Аудан бойынша 18 515 оқырман кітапханамен тығыз байланыста. Жылдан-жылға аудандық, ауылдық кітапханаларда кітап қоры жаңартылып, кітапхана жұмысы жаңа заманауи техникалармен жабдықталуда. Коворкинг орталығы, тегін интернет желісі және аудио-видео құрылғылар пайдаланушылардың электрондық ақпараттық ресурстармен жұмыс істеуіне мүмкіндік беруде. Сондай-ақ кітапханашылар мүмкіндігі шектеулі оқырмандарға, оның ішінде көзі көрмейтін жандарға кітаптарды бірнеше тілде оқып беретін арнайы құрылғымен қызмет көрсетіп, кітапхана жұмысын одан әрі жандандыруда.

Білімнің киелі құтханасы, руханият ордасы, білім мен мәдениеттің алтын бесігі саналатын кітапхананың ұжымына қазақ баспасөзіне қолдау білдіріп, аудандық басылымға түгел жазылғанына ризашылығымызды біл­діріп, жұмыстарына жеміс тілейміз.

Т.ҚАЛДЫБЕКҚЫЗЫ