Қазыналы қарттар – қоғам ұйытқысы
Әрқашанда қазақ халқы – қарттарын қадірлеп, құрмет көрсеткен ел. Дана қарт – қай қоғамның да байлығы екені сөзсіз. Президент Қасым-Жомарт Кемелұлы Тоқаев «Халқымыз үнемі үлкенге құрмет, кішіге ізет көрсете білген. Осы құндылықтарды дәріптеп, бүгінге жеткізу арқылы қарияларымыз ұлт ретінде сақталуымыз үшін барын салған» деп ардагерлердің қоғамдағы рөлін айшықтап берген болатын.Бүгінде мемлекетімізде ардагерлерді қолдау мемлекеттік саясаттың бір бөлігіне айналып отыр. Бұл мақсатты бастамалар, ауқымды жұмыстар ауданымызда да жүзеге асырылуда. Қазақта «Қартын сыйлаған елдің қазынасы мол» деген ұлағатты сөз бекер айтылмаса керек. Бейнетінің зейнетін, еңбегінің жемісін көріп, зейнеткерлік жасқа жеткен ардагерлердің бос уақытын тиімді ұйымдастыру барысында облыста, ауданда әртүрлі іс-шаралар, басқосулар өткізіліп тұрады. Облыс әкімінің бастамасымен қазыналы қарттарымызға құрмет көрсетілуде. Қартын сыйлаған ауданымызда да қарттарымыз қамқорлыққа алынған, кейінгі буын ауданға қатысты шаруаларды да ардагерлермен кеңесіп отырады. Ардагерлер қазіргі таңда билік пен халықтың арасындағы алтын көпірге айналып отыр. Сондай-ақ өзекті мәселелердің шешілуіне лайықты үлес қосып, елдің бірлігін сақтауда ақыл-кеңестерін айтып, өз тәжірибелерімен бөліседі. Бірлескен жұмыстың арқасында ауданымыз дамып, күннен-күнге көркейіп келеді.
Үлкенге құрмет, кішіге ізет көрсете білген аудан жастары кез келген мерекеде, іс-шарада ардагерлерге ерекше құрмет көрсетіп, төрден орын береді. Бұл да болса зейнеткерлік жасқа жеткен қазыналы қарттарға деген құрметі, жастардың көрегенділігі.
«Өнегелі қарт жоқ жерде өнерлі жас та жоқ» демекші, өскелең ұрпақ саналы болып жетілуі үшін біз өнегелі қалпымыздан таймай, әркез ақылымызды айтып, тәлім-тәрбие беріп, жол көрсете алуымыз керек.
Шахарбек НҰРСЕЙІТ,
Халықаралық «Қазақ тілі» қоғамдық бірлестігі аудандық филиалының төрағасы
