Азамат есімі ардақталды
![](/uploads/posts/2023-10/medium/1698431384_395633066_281491301521488_9097233060828319952_n.jpg)
«Орнында бар оңалар» демекші, ардақты азаматтың отбасының бастамасымен аудан ардагерлерінің ұсынысымен А.Әбдуовті еске алу іс-шарасы мен спорттық турнир ұйымдастырылды. Іс-шараға аудан әкімінің міндетін атқарушы Д.Байдушев, аудандық ардагерлер кеңесінің төрағасы М.Келдібаев, аудандық мәслихат депутаттары, ардагерлер мен зиялы қауым өкілдері, марқұмның ағайын-туыстары, ұрпақтары қатысты.
Еске алу іс-шарасында Д.Байдушев мемлекеттік қызмет саласында жемісті еңбек еткен азаматтың ауданның игілігі жолында атқарған жұмысы туралы естеліктерді жаңғыртты.
– Жомарт жүрегімен, адамгершілік қасиетімен, адал ниетімен ерекшеленіп тұратын адамдар болады. Сондай азаматтардың бірі де бірегейі Асылбек Әбдуов еді. Білікті басшы, құрыш қол құрылысшы бола білген азамат өмір сүрген қоғамына адал еңбек етіп, айналасындағы дос-жарандарын жоғары сыйластықпен бағалап, абырой иесі болды десем, артық емес. Туған-туысқандарына қолынан келгенше қамқоршы бола білді. Қай жұмысында болмасын мансабына мастанып, менменсініп кеуде көтергенін көрмеппін. Өмір бойы іс пен сөздің тазалығын, әділдігін, шынайылығын қалайтын қалпынан айныған емес. Сондықтан Асекеңді мемлекеттік қызмет саласының жас мамандары үлгі тұтты, тәжірибесінен, азаматтық болмыс-бітімінен өнеге алды. Бүгінгі еске алу іс-шарасының және спорттық турнирдің аудандық деңгейде өткізілуі де ардақты азаматтың қоғамдағы орны жоғары екенін білдіреді.
А.Әбдуов жоғары білімді маман ретінде оқуын аяқтағаннан кейін Тереңөзектегі ХРСУ мекемесіне тас қалаушы шебер болып орналасып, өз армандарын жүзеге асыруға білек сыбана кірісіпті. Жұмысына жауапкершілікпен қарап, тапсырмаларды тиянақты орындауға дағдыланған азаматтың еңбек жолы аудандық ауылшаруашылығы басқармасында, жобалау құрылыс кооперативінде, 54-жылжымалы мехколлонада жалғасады. Көп ұзамай аудандық РСУ мекемесінің бастығы болады. 1987-1992 жылдары аудандық ауылшаруашылығы басқармасы бастығының құрылыс жұмыстары жөніндегі орынбасары қызметін абыроймен атқарады. Бұл Асылбек Сұлтанұлының жұмысқа ерте келіп, кеш қайтып жүрген ізденіске толы кезеңдері еді. Сырдария ауданы 2013 жылдан бастап құрылыс алаңына айналды. Қарқынды құрылыс аудан орталығымен қоса әр ауылда жүргізілді. Осы ретте, республика бойынша тұңғыш рет аудандық бюджет есебінен әлеуметтік нысан салынғанын айта кетуіміз керек. Бұл сол кезде аудан басшылығының, ауданның құрылыс саласын басқарған Асылбек Сұлтанұлының еңбегінің жемісі еді, – деді Димаш Серікбайұлы.
Өз кезегінде аудандық ардагерлер кеңесінің төрағасы Мұса Келдібаев аудандағы әлеуметтік нысандармен қатар көпір құрылыстарының тарихы жөнінде айтты.
– 2014 жылдың 20 қыркүйегі аудан тарихында алтын әріппен жазылады. Себебі дәл осы күні Сырдария өзеніне салынған көпір салтанатты түрде ел игілігіне қолданысқа берілді. «Ғасыр жобасы» саналатын маңызды нысанның құрылысы аяқталғаннан кейін Іңкәрдария, Ақжарма, Шаған, Шіркейлі, Н.Ілиясов, Қоғалыкөл, Айдарлы, Жетікөл, Бесарық, Аманкелді елді мекендері тұрғындарының аудан орталығына іркіліссіз қатынауына жол ашылды. Бірліктің нығаюына, берекенің тасуына дәнекер болған алтын көпір Сырдария ауданының әлеуетін арттырып, тыныс-тіршілігін кеңейтуде. Бұл істі ұйымдастыруда ауданның құрылыс саласын басқарған Асылбек Әбдуовтің еңбегі зор. Облыс, аудан әкімдігі тарапынан берілген тапсырмаларды уақытылы орындап, алып құрылысты жүргізген мердігер мекемемен түсінісіп, көпірдің сапалы салынуын, пайдалануға берілуін ұйымдастырған азаматтың еңбегі халық жадында. Асекең құрылыс саласын басқарған уақытта ауданда әлеуметтік нысандардың, мектептер мен балабақшалардың да құрылысы жүргізілді. Ол құрышқол құрылысшы, құрылыс саласының өте тәжірибелі маманы болса да мемлекеттік қызметке араласып, жас мамандарды дайындады. Халық сеніміне ие болып, Қазақстанның Құрметті құрылысшысы атанды, аудандық мәслихаттың депутаты болды. Есімі Қазақстанның құрылыс саласының Құрмет кітабына енді. Мұнан бөлек мерекелік медальдармен, облыс, аудан әкімінің Алғыс хаттарымен марапатталды. Өмірінің соңына дейін аудандық құрылыс, сәулет және қала құрылысы бөлімінің басшысы ретінде еңбек етті. Оның жарқын бейнесі ұмытылмайды, – деді Мұса Алпысбайұлы.
Мұнан бөлек құрылыс саласының ардагерлері Төлеу Сүлейменов, Амантай Ұзақбаев, сондай-ақ Әбдуовтер әулетінің атынан Талапбек Сұлтанұлы сөз сөйледі. Бұл күні А.Әбдуовті еске алу іс-шарасы аясында аудан ардагерлері арасында шахмат, дойбы бильярдтан турнир ұйымдастырылды. Турнирдің өтуіне ардақты азаматтың отбасы қолдау көрсетті. Ал ұйымдастырылуына аудан әкімдігі, аудандық мәдениет және спорт бөліміұйытқы болды. Турнир қорытындысында жеңімпаз атанған ардагерлерге қомақты қаржылай сыйақылар мен Алғыс хаттар табысталды. Сонымен қатар ардагерлер мен жиналған қауым А.Әбдуовтің рухына Құран бағыштау бағытында ұйымдастырылған қонақасына қатысты. Еске алу іс-шарасының, спорттық турнирдің өткізілуіне қолдау білдірген азаматтарға А.Әбдуовтің бауырлары және жары, ауданның Құрметті азаматы Б.Өтегенова алғыс айтып, ауданның әлеуметтік-экономикалық дамуына, құрылыс саласының өркендеуіне тілектес екенін білдірді.
А.Ибрагимұлы