Тоспа доп бәсекесінде ұстаздар топ жарды

Санаулы күннен кейін елімізде білім ошақ­тары оқушыларға есігін айқара ашады. Қазіргі уақытта ата-аналар базарға ағы­лып, балаларының жаңа оқу жылына керекті құрал-саймандарын сақадай сай ету­де. Өз кезегінде тамыз айының алғашқы онкүндігінде бастау алған «Мектепке жол» ак­циясы аудан көлемінде ұйымдастырылу үс­тінде. Жылдағы дәстүр бойынша білім саласы қызметкерлері республикалық акцияға үн қосты.

Негізінен, республикалық «Мектепке жол» акциясы аясында Сырдария ауданы бойынша білім бөліміне қарасты дене шынықтыру пәні бірлестігінің мұғалімдері арасындаволейболдан жарыс өткізілді. Аталған жарыс барысында 80-ге жуық білім саласының мамандары өзара бақ сынасты. Тартысты ойын кезінде әзілі  мен сөзі жарасқан әріптестер үздік болуға ұмтылды. Тоспа доп бәсекесінде әрбір ұжымның ұйымшылдығы көрінді. Өз кезегінде Сырдария ауданы бойынша білім бөлімінің әдіскері Сұлтан Үсенов ізгілікті іс-шара жөнінде пікір білдірді.

– Жалпы, аудандық волейбол жарысының негізгі мақсаты – мектепке жол акциясы негізінде аз қамтылған отбасыдан шыққан оқушыларға жаңа оқу жылына оқу-құрал жабдықтармен көмек көрсету, білім қызметкерлерін спорт түрлері арқылы саламатты өмір салтын қалыптастыру болып табылады. Өткен жылы ауданға қарасты 17 білім ошағы қатысуға ниет білдірсе, биыл олардың саны 5-ке қысқарды. Айта кетейік, №35, 36, 42, 44, 129, 131, 132, 135, 139, 147, 174, 191 секілді ұлағат ұяларының дене шынықтыру пәні бірлестіктері белсене қатысты. Әркез баланың қуанышы үшін бар жақсылықты жасауға болады. Халық баласын білім нәрімен сусындатып келе жатқан ұстаздар қауымы 12 отбасының баласына ерекше қуаныш сыйлады. Бұл ретте, әріптестерімізге айрықша алғыс айтамыз, – деді Сұлтан Үсенов.

Өз кезегінде жарыс қорытындысы бойынша жүлделі І орынды №44 орта мектеп ұжымы, ІІ орынды №191 орта мектеп ұжымы, ІІІ орынды №36 мектеп лицей мен №147 орта мектеп ұжымы жеңіп алды. Жеңіс тұғырынан көрінген білім қызметкерлеріне арнайы диплом, алғыс хат, кубок табысталды.

– Тоспа доп бәсекесінде қоғалыкөлдік ұстаз­дар топ жарғанына қуаныштымыз. Біз осы жа­рысқа аса ыждағаттылықпен дайындалдық. Қашан­да халық баласына сапалы білім беруге ұмтылатын ұлағатты ұстаздар қауымы ізгі­лікті істің басынан табылды. Шын мәнінде, рес­пуб­ликалық дәрежеде өткізіліп келе жатқан «Мектепке жол» акциясына үлес қосқаны үшін әріптестеріме ризашылығымды білдіремін. Әрбір үйде, көпбалалы отбасында мектепке дайындық жүргізген ата-аналар базар бағасының жоғары екенін тілге тиек етеді. Сондықтан бірлестік тарапынан ұйымдастырылған ізгілікті іс-шарадан қалыс қалмауға тиіспіз. Баланың жүзінен тек күлкі көріп, бақытты екенін сезінсек біз үшін жеткілікті. Өз кезегінде әріптестеріміз республикалық ак­цияға үн қосып қана қоймай, алдағы жаңа оқу жылында атқарылатын жұмыстарды талқылады. Жаңартылған білім мазмұнына байланысты өзара тәжірибе алмасу жүргізілді, – деді №44 орта мектептің мұғалімі Тұрар Жағыпаров.

Балтабай ОРДАБЕКОВ