«Әжелер мектебінің» ізгі ілтипаты

Ауданда әйелдер ке­ңе­сі жанындағы «Әже­лер мектебінің» тағылымды жұмысы көп­ке үлгі. Құрамын­да ауданға еңбегі сің­ген қоғам қай­рат­керлері мен арда­гер-ұстаздар бар ұйым өнегелі істің басы-қа­сынан табы­лып жүр. Ұлттық құн­­дылықтарды насихаттауды мақсат еткен ардақты әже­лер ай са­йын кент ор­талығында­ғы «Дос­тық» үйінде бас­ қо­сып, ізгілікке толы іс-шараның ұйытқысы ­болуда.

Жақында кезекті басқосуды ұйымдас­тыр­ған аудандық әйелдер кеңесінің төрайы­мы Ұлмекен Жанәлиева «Әжелер мектебінің» мү­шеле­рімен тағы бір басқосу өткізді. Бұл жо­лы жақында ғана саяси науқанда халық қа­лаулылары атанған облыстық мәслихат депутаты Ж.Ембергенов, аудандық мәслихат депуттары А.Есназар, А.Ибрагимұлын шақырып, аналық лебіздерін білдірді.

– Қоғамның кез келген саласын өрге сүй­реп, өнегелі ісімен ерекшеленетін әйел-аналар­дың бүгінде атқарып отырған қызметі орасан зор. Ауданда құрылған «Әжелер мектебінің» құрамындағы ақ жаулықты аналар керемет іс-шаралар ұйымдастырып, сәтті өтуіне атсалысып келеді. Соның бірі биыл өткен сайлау­­да белсенділік танытқанын айтуымыз керек. Әйел-аналардың арасында науқан кезінде үміткерлерге қолдау білдіріп, үгіт-насихат жұ­мысын жүргізіп, сенімді өкілі болған әжелер бар. Міне, бүгінде ел сенімін ақтауға кірісіп кет­кен депуттарды арнайы ортамызға келді, азаматтар әжелердің батасын алсын деген ниетпен ортамызға шақырдық, – деді аудандық әйелдер кеңесінің төрайымы Ұ.Жанәлиева.

Облыстық мәслихат депутаты мандатына ие болған Жұмабек Ембергенов әжелер қауы­мына ризашылығын білдірді.

– Аналарды құрметтеу – әрбір перзенттің қасиетті парызы. Біз нәзік жанды әйел-ана­лар­ға шексіз ілтипатымызды көрсетуіміз керек. Ер азаматтарды қадірлей білген аналарымызды мың мәрте сыйласақ та аздық етеді. Ауданның дамуына үлес қосып, қоғамдық жұ­мыстың бел ортасында жүрген аналарға ал­ғысымды білдіремін. Ел сенімін ақтауға белсене кірісіп кеттік. Бүгінгі кездесуді пайдаланып, саяси науқан кезінде сенімді өкілім ретінде қолдау білдірген ардагер-ұстаз Алтын Нұртаеваға алғысымды білдіріп, ардагер-ұстаз Роза Үмбетаева екеуін туған күндерімен құттықтаймын, – деді облыстық мәслихат депутаты Ж.Ембергенов.

Ақ жаулықты аналарға жүрекжарды лебіз­де­рін білдірген аудандық мәслихат депуттары Алмас Есназар мен Ақтөре Ибрагимұлы да халық қа­лаулысы ретінде ел сенімін ақтауға уәде берді.

Өз кезегінде кент әкімі Ержан Бахтияров әжелерді қасиетті Рамазан айының аяқта­луымен, келіп жеткен Ораза айтпен құттық­тады. Басқосуда ел азаматтарына әжелердің атынан ел ама­натын жазып жүру үшін қа­ламсап пен қо­йын дәптер сыйға берілді. Жи­налған қауымға, халық қалаулыларына аудан­дық ардагерлер кеңесінің төрағасы Мұса Кел­дібаев батасын берді.

Ақ дастархан басына жиналған «Әжелер мектебінің» кезекті отырысы ардагер-ұстаз Ро­за Үмбетаеваның мерейлі 71 жасқа келу құр­метіне арналған іс-шарамен жалғасты. Ардақ­ты әжелер туған күн иесіне ақ тілектерін айтып, өнегелі өмірі туралы жылы лебіз білдірді.

Роза Шайхысламқызы – саналы ғұмырын ұс­таздыққа арнаған ардақты жан. Қызылорда қаласында 1952 жылы дүниеге келген ар­дақты ұстаз 1971-1975 жылдары Н.В.Гоголь атындағы Қызылорда педагогикалық инсти­тутының ағылшын тілі факультетін бітірген. Ең­бек жолын 1975 жылдан бастап, аудандағы О.Әбілпаттаев атындағы №210 қазақ орта мектебінде ағылшын тілі пәнінен ұзақ жыл дәріс берді. Бірінші санатты мұғалім шә­кірт­теріне ағылшын тілін үйретуде көптеген жетіс­тіктерге жетті. Соның негізгісі – 2004 жылы «SHARE» карпорациясының басқаруымен «Бі­лім – болашақтың келешегі» атты тақырып­пен өткен ағылшын тілі мұғалімдері арасында бай­қаудың облыстық кезеңінде жеңімпаз атануы. Сол жылы үздік деп танылған облыстың үш мұ­ғалімінің қатарында Роза Үмбетаева АҚШ-тың Техас штатының Хьюстон қаласында 1 ай бойы жаңа технологияны меңгеру бағы­тында білімдерін жетілдіріп келді. Бұл сапар сырдариялық ұстазға үлкен жігер мен шы­ғар­машылық шабыт берді.

Шетелде білімін жетілдірген ұстаз ин­тер­националдық білім жетілдіру сертификатымен марапатталды. Тәжірибелі ұстаз 35 жылдан астам еңбек жолында шәкірттерін шыңға шығарып, талай мәрте марапат төрінен көрін­ді. Зейнеткерлік жасқа жеткен Роза Үмбетаева – өнегелі ұл-қыз тәрбиелеп отырған бақытты ана. Имандылық пен ізгілікті серік еткен. Салт-дәстүрді насихаттаудан жалықпайтын ар­дагер-ұстаз қоғамдық жұмыста белсенді. «Әжелер мектебінің» жұмысын жандандыруға атсалысып келеді.

Тағылымды іс-шараның кейіпкерлері мұн­дай басқосуды ай сайын ұйымдастыруды дәс­түрге айналдырған. Әрбір басқосу «Әжелер мектебінің» бір мүшесіне арналады. Мұнда ардақты да аяулы жандардың өнегелі өмір жолы насихатталып, жас аналарды, жас отбасыларды тәрбиелеу мақсат етіледі. Үрдіске айналған мұндай іс-шаралардың жас буын өкілдеріне берері көп.

Бибісара ЖАНӘЛІ