Ауылдың алты ауызын шырқады
Саналы ғұмырында сан түрлі салада еңбек етіп, сол бейнетінің зейнетін көріп отырған ардагерлер бүгінгі таңда да қоғам өмірімен етене араласып келеді. Олардың ішінде ақ жаулықты аналар жас ұрпақ тәрбиесінде, ұлт мәдениетін дамытуда өнегелі істерімен көрініп жүр. Атап айтқанда, түрлі салада бейнет кешкен әзиз аналар ауылдардағы мәдениет үйлерінде топтасып, әжелер ансамблі құрамында ауылдың алты ауызын шырқап жүр. Олардың қатарында Тереңөзек кенті клубы жанынан құрылған «Ару Ана» әжелер ансамблі бар.Әжелер ансамблі 2012 жылы құрылған. Көбіне ел жадында сақталған халық әндерін орындайтын асыл жандар өз өнерлерімен кейінгі толқынға рухани құндылық сыйлай отырып, туған жерге, елге деген сүйіспеншілікті дәріптейді. Әндері арқылы туған жердің қадір-қасиетін ұғынуға шақырады.
Халықаралық қарттар күні қарсаңында «Ару Ана» әжелер ансамблі тұрғындарға «Ауылым – алтын бесігім» тақырыбымен концерттік бағдарламасын ұсынды. Іс-шара басында әжелер ансамблінің құрылу тарихы мен құрамы жайлы бейнеролик көрсетілді. Одан соң ансамбль мүшелері халық әндерін орындап, көрерменнің қошеметіне бөленді.
Сондай-ақ, ардақты әжелер өздерінің жеке орындауындағы әндерін шырқады. Атап айтқанда, Нағила Мұқанова «Шынарым», Роза Байтөреева «Әдемі ау», Роза Ағатаева «Анашым», Жұмакүл Көшербаева мен Алтын Нұртаева «Ақмаңдайлым» әндерін шырқаса, Зияш Үсенова «Замандас», Құндыз Айманова «Талғардың таза ауасы» атты халық әндерін әуелетті. Сонымен қатар, Ғалия Сансызбаева, Гаухар Аяпова және Роза Шахметовалар да әндер шырқады.
«Жылылық күннің көзінде, тәрбие әже сөзінде» дегендей, өмірлері өнегеге толы ардақты жандар ауданның руханиятын өркендетуге үлестерін қосып, ауылдың алты ауызын шырқай жүріп, кейінгі қыз-келіншектерге үлгі көрсетіп келеді.
Ердос БЕРКІНБАЕВ
