Көңілдің нұры әйелден тарайды

Әлемнің шуағы күн нұ­рынан тараса, көңілдің нұры әйел-ананың жүзі­нен тарайды. Бүгінде әйел адамдардың қоғам­дағы орны мен рөлі ны­ғая түскенін тыныс-тіршіліктен аңғару қиын емес. Қай саланы алып қарасаңыз да әйел аза­маттарының еліміздің дамуында қолтаңбалары қалыптасқан. Ұлттық құндылық – салт дәстү­ріміздің жандануына, ұрпақ тәрбиесінде нәзік жандыладың үлесі зор.

Жақында Кеңес Одағының Батыры Нағи Ілиясов атындағы ауылда мәні мен мазмұны ерекше іс-шара болды. Ауыл­дық әйелдер кеңесінің төрайымы М.Тәу­тенова мен ауылдық мәдениет үйінің ұйым­дастыруымен «Ана әлемі – қоғам әле­мі» тақырыбын арқау еткен пікір­ алы­суға облысқа еңбегі сіңген ел аналары мен ауылдың белсенді кәсіпкер келін­шек­тері, қоғамдық жұмыста белсенді әйел­дер, ақ жаулықтары аналар қатысты. Тәр­бие­лік маңызы зор іс-шараға облыстық «Әйелдер күші Альянсы» қоғамдық бір­лес­тігін басқаратын Рахима Ахметова, Сыр­дария аудандық әйелдер кеңесінің төрайы­мы Ұлмекен Жанәлиева, Тереңөзек кенті әйелдер кеңесінің төрайымы, қол­өнер шебері Алтын Нұртаева, «Сұлу-ай» шығарма­шылық өнер орталығының құ­рылтай­шысы, аудандық мәслихат депутаты Анар Қал­дыбаева шақырылды.

Ауылдық мәдениет үйінде ұйымдас­тырылған дөңгелек үстел басталмас бұрын фоэде орналастырылған ауыл ісмер­лерінің көрмесі таныстырылды. Көрмеге ауыл­дың қолөнер шеберлері Салтанат Ер­па­нова, Жұлдызай Қосуақованың ұлттық нақыштағы бұйымдары, кондитер өнім­дерінің бесапсап шебері, бал ара өсірушісі Эльмира Төретаева, ауылдағы «Қайнар» сауда дүкенінің иесі, сүт өнімдерін өндіруші Ақтолқын Қыстаубаеваның қолда­рынан шыққан өнімдері қойылған. Он сау­сағынан өнері тамған қыз-келіншектер бүгінде ша­ғын бизнес иесі атанып, ауыл тұрғын­дары­на сапалы қызмет етіп келеді.

Түтіні түзу шығып, берекесі мен та­тулығы тасыған Нағи Ілиясов ауылын­дағы халық санының 1135-і әйел адамдарды құрайды. Ауылда бүгінде кәсіпкер әйелдердің саны 20-ға жетіп, ауыл еңбек­керлерімен қатар ауылдың дамуына атсалысып келеді. Қалаға бергісіз ауылдың аты бүгінде республикаға танылды. Шетелдерден, еліміздің түкпір-түкпірінен келетін меймандар шағын ауылдың гүлденгенін талай көзімен көрді. Туған ауылды көр­кейтіп, шаруашылықтың дамуын қолға алған инвестор, Қазақстанның Еңбек Ері Абзал Ералиевтің еңбегі ұшан-теңіз. Осындай гүлденген үлгілі ауылға айналуға ел азаматының ерекше қолтаңбасы бар екенін айту керек.

Кездесуде алдымен сөз алған Рахима Қаржаубайқызы киелі Сырдарияның Шаған ауылында балалық шағы өтіп, сондағы мектепте білім алғанын айтып, ерекше тебіреніспен сөз сөйледі. Туған ауылдың өсіп-өркендеуіне атсалысып, көптеген қызмет атқарып, бүгінде қоғамдық қыз­мет­те жүрген Рахима апай Нағи Ілиясов ауылында республикалық, облыстық әйел­дер форумын өткізгенін айтты. Бүгінде облыста «Әйелдер күші Альянсы» қоғамдық қорын басқаратын іскер ана саясаткер әйелдердің клубын жандандыруға, саяси әйелдер мектебінің жұмысын жүргізуге атсалысып, «Жас көшбасшылар» мектебін ұйымдастырғанын тілге тиек етті. Сонымен қатар аймақтың әйелдерін қоғамнан тыс қалдырмау мақсатында «Бойтұмар ханым» қоғамдық қорын үйлестіріп, ісмер әйел­дерге қолдау көрсету мақсатында көп­теген іс-шаралардың өтуіне ұйытқы болып­ келеді.

– Қазақ әйелдердің болмысында ұлт тазалығы жатыр. Отбасына деген адал­дық, жақсы қасиеттерді бойына сіңіру, үйрену, тез бейімделу, қайсарлық секілді қасиеттерді қазақ әйелдерінің бойынан көруге болады. Сондықтан қай кезде де менің мақсатым – қоғамда әйелдердің бел­сенділігін, мәртебесін көтеру, олардың іскерлігін насихаттау, барлық саладағы орнын айшықтап, насихаттау. Алда көптеген жоспарымыз бар. Олардың барлығында әйелдердің орны ерекше аталады және әйелдердің қатысуымен өтеді, – деді Рахима Ахметова.

Ауданда көшбасшы әйелдердің көшін бастап, 30 жылға жуық уақыт ауданның әйелдеріне жетекшілік етіп келе жатқан, бүгінде аудандық әйелдер кеңесін басқа­ратын Ұлмекен Жанәлиева әйелдер бел­сенді болған сайын қоғамда өзгеріс болатынын айтты. Күні кеше ғана елімізде өткен саяси науқан туралы пікір білдіріп, халық қалаулысы ретінде мандатқа ие болған қыз-келіншектерге, жастарға әр­кез қолдау білдіретінін, екінші мәрте депутат болған мәдениет саласының білікті маманы, «Сұлу-ай» шығармашылық өнер орталығының құрылтайшысы Анар Қалды­баеваға сәттілік тіледі.

– Сырдариядан талай белсенді әйел аналар шықты. Оған тарих куә. Солардың қатарында жерлесіміз Рахима Ахметова кезінде «Ақ орамал» деген үндеуін жария­лағаны көптің есінде. Міне, осы жобаны қолдап, ауқымды іс-шара жасап, қыз-келіншектердің арасында ақ орамалды насихаттадық. Қазір басымыздан ақ орамалымыз түспейді. Астананың төрінде өтетін жиындарға да осы ақ орамалыммен қатысамын. Сондықтан қазақтың ке­лін­шектері мен аналары орамалдың киесін түсініп, басынан орамалын тастамауы керек. Қай қырынан алып қарасақ та әйелдер үлгі болса, болашағымызды тәр­бие­лейміз. Ер азаматтың жақсы болуы әйелге байланысты, оны төрге сүйрейтін әйел екені рас. Сондықтан отбасында, ошақ қасында тәрбиелі әңгіме, ғибратты сөз­дер мен өнегелі өсиет айтылуы керек, – деді Ұлмекен Шанайқызы.

Нағилық әйел-аналармен кездесуде қол­өнер шебері Алтын Нұртаева өзінің зей­нет­керлік жасқа жетсе де, қолөнерден қол үзбей, екі қолға бір жұмыс тауып, тыным таппай ісмерлікпен айналысып жүргенін айтты. Әлеуметтік желіде де белсенді шебер бүгінде қолынан шыққан қолөнер бұйымдары арқылы танымал болғанын, әлеуметтік желіні дұрыс қолданса оның пайдалы тұсы болатынына көзі жеткенін, қолдан келетін жақсы істі табыс көзіне айналдыруға болатынын айтты.

– Қырық жылдан астам уақыт ұстаз болдым. Зейнеткерлікке шыққаннан кейін қоғамдық жұмысқа араласып, әйел-ана­лардың арасында белсенділік танытып, өзім де пайдалы іспен айналысуға бел бай­ладым. Тігін тігіп, ұлттық нақыш­тағы балаларға арналған бірін-бірі қайталан­байтын бұйымдар тіге бастадым. Қазір ою-өрнекпен безендіріп тіккен әртүрлі бұйымдарым сұранысқа ие, соның арқа­сында көптеген көрмелерге қатысып жүрмін. Салт-дәстүріміз тұнып тұрған білім. Ал оны ұқсата білу қыз-келіншектердің қолында. Сондықтан жалықпай, шаршамай ісмерлікпен айналысуға шақырамын. Бүгін қалаға айналған ауылда бас қосып отырғанымызға қуаныштымын. Аналардың еңбегін насихаттайтын іс-шараның ортасында отырғаныма қуаныштымын. «Үй­де әйел күлімдесе, аспандағы күн де жар­қырай түседі» дегендей жүздеріңіз жарық, отбасыларыңызда тек береке-бір­лік болсын, – деді ардагер-ұстаз А.Нұртаева.

Ауданның өнерін өрге сүйреп, талай жас өнерпаздардың жұлдызын жағып жүр­ген басшы, Ғафурдин Жанұзақов атындағы Айдарлы ауылдық клуб үйінің директоры Анар Қалдыбаева осыдан 2 жыл бұрын «Сұлу-ай» шығармашылық өнер ор­талығын құрды. Бүгінде ауданның 8 елді мекенінде өз үйірмелері жұмыс жасайтын орталықта өнерлі балалар тәрбиеленіп, шығармашылықпен айналысады. Тың жобаны іске асырған Анар Сраждинқызы екінші рет аудандық мәслихат депутаты атанды. Өнер жанашыры әріптестерінің өткізіп отырған іс-шарасына ризашылығын білдіріп, әйел-аналардың рөлін арттыруға алдағы уақытта әлі талай жұмыс жасайтынын жеткізді. Өзінің атынан жиналған әйелдер қауымына гүл шоқтарын ұсынып, өнерпаздармен қосылып «Ана туралы жырды» шырқады.

Ауыл аналарының атынан ардагер-ұстаздар Манат Оразбекова, Шолпан Тойбаева, ардақты ардагер дәрігер Сәрсенкүл Олинова, мәдениет саласының ардагері Күләш Құдабаева, ауылдық әйелдер кеңе­сі­нің төрайымы Мәриямкүл Тәутенова, жас көпбалалы ана Клара Мәлібекова жас ана­ларға ғибратты сөздерін арнады.

Тәрбиелік мәні зор іс-шараның соңында кәсіпкер келіншектерге ауылдық әйелдер кеңесінің «Алғысы» тапсырылды. Ауыл өнерпаздары Н.Тұранов, Б.Қалиасқарова, А.Әмірбек кездесуді мерекеге айналдырып, әннен шашу шашты.

Бибісара ЖАНӘЛІ