Тіршілік тынысы Tirshilik-tynysy.kz ақпараттық агенттігі
» » Ұрпақ тәрбиесіне ұлттық ұстаным қажет

Ұрпақ тәрбиесіне ұлттық ұстаным қажет

Ұлттық тәрбие тұрғысында сөз қозға­ғанда ата-ананы атап­ өтпеу мүмкін емес. Әсі­ре­­се, ұр­пақ тәрбиесі әйел-ана­ға жүкте­ле­тіні бесене­ден белгілі. Сон­дықтан бір қо­лымен бесікті, екінші қолы­мен әлемді тербете­тін әйел­дердің, олардың ішінде өне­гесін көр­сетіп жүрген ана­лар­­дың қо­ғамдағы орны бөлек.

Аудан орталығындағы №35 И.Тоқ­тыбаев атындағы мектеп-лицейде ар­дақты әкелер мен мейірімді әйел-аналар басқосты. Оған аудан әкімінің орынба­сары Д.Байдушев, облыстық ҚХА жа­нындағы Аналар кеңесінің төрайымы Рахима Ахметова, облыстық мәслихат депутаты, облыстық «Іскер әйелдер» ас­со­циациясының төрайымы Манат Алма­шева, аудандық Аналар кеңесінің төр­айымы Балшекер Өтегенова қатысты. Бас­­қосу «Мәдениетті ана – мәдениетті ұлт» жобасы аясында өтті.

Кездесуді ашқан аудан әкімінің орынбасары Д.Байдушев ұлттық тәрбиеде ана­лардың рөлі басым екеніне тоқталды.

– Ұлттық тәрбиенің бастауы, қайнар көзі саналатын аналар өнегесінің қай қоғамда болмасын алар орны ерекше. Өйткені жер бетіндегі жақсылық, ізгі­лік, қайырымдылық атаулының бәрі де ананың ақ сүтінен тарайды. Баланы жастайынан тура жолдан тайдырмай тәр­­биелеудегі ананың рөлі айтпаса да түсінікті. Сондықтан ұрпақ тәрбиесінде ананың мейірімділігі, қамқорлығы тұтас ұлттың ұйытқысы саналады. Жалпы ұр­пақ тәрбиесіне ұлттық ұстаным қажет, – деді аудан әкімінің орынбасары.

Мұнан соң кездесуге арнайы келген облыстық ҚХА жанындағы Аналар кеңесінің төрайымы Р.Ахметова сөз сөй­леп, отбасылық құндылықтар, бүгінгі ұр­пақ тәрбиесінің жай-күйі туралы айтты.

– «Отан отбасынан басталады» деген нақыл қандай қоғам болса да маңыз­ды­лығын жоймақ емес. Тәуелсіздік жыл­дарында отбасы беделін нығайту ба­ғы­тында қыруар шаруа атқарылды. Ана мен баланы қолдау бойынша бағ­дар­ламалық құжаттар қабылданып, мемле­кеттік дең­гейдегі отбасылық сая­­сатта тұтастай жүйе қалыптасты. Осы тұста, отбасылық саясаттан бөлек отбасы­лық құндылықтар деген бар. Оған халқымыздың тарихымен бірге қайнап, пісіп шыққан отбасылық дәстүрлер жатады. Соның негізінде ұр­пақ өнеге алатын тағылымды дүниелер жеткілікті. Уақытында жас Абай «Мен Сізден оздым әке, мені бүкіл қазақ таниды» дегенде әкесі Құнанбай «Менен оздым деу үшін алдымен Абайдай ұл тудырып ал» дегені ұрпақтан-ұрпаққа жал­ғасып келе жатқан өнеге. Міне, ұрпақ тәрбиесіне ерекше мән беретін қазақ қоғамындағы отбасылық құндылықтар бүгінде құлдырауға ұшырап бара жатқаны ащы да болса шындық. Отбасылық кикіл­жіңдер салдарынан ажырасулар көбейді, ұрпақ тәрбиесінде смартфондар алдыңғы қатарға шығып кетті. Оның салдары қо­ғамға қауіпті. Сондықтан Қазақстан хал­қы Ассамблеясының Аналар кеңесі «Мә­дениетті ана – мәдениетті ұлт» атты жарқын жобаны қолға алды, – деді Р.Ахметова.

Сөз кезегінде облыстық мәслихат де­путаты, облыстық «Іскер әйелдер» ас­социациясының төрайымы М.Алмашева әйел-аналардың әлеуетіне, жағдайына тоқталды. Халық қалаулысы іскер әйел­дердің елдің дамуына қосар үлесі зор екенін атап, кәсіппен айналысатын нә­зік жандыларға қолдау көрсетілетінін жеткізді. Меймандар ауданда өнегелі іс­терімен үлгі көрсетіп жүрген бірқатар құрметті жандарды «Ел анасы» номинациямен марапаттады.

Басқосу барысында аудандық Әкелер кеңесінің мүшесі, еңбек ардагері Мектепхан Елеусінов, ардақты ана, «Сырдария ауданының Құрметті азаматы» Алма Бақтиярова, аудандық Аналар кеңесінің мүшесі Татьяна Ким сөз сөйлеп, отбасы құндылығы, қоғам мен отбасы байланысы, әке мен ана рөлі төңірегінде өз ой-пікірлерін ортаға салды. Ауданда ұлттық тәрбиеге қатысты үлгілі үрдістерді жаң­ғырту керектігін тілге тиек етті.

Кездесу қорытындысында аудандық Аналар кеңесінің төрайымы Б.Өтегенова алдағы жоспарларымен бөлісіп, жас ұр­паққа тағылымды тәрбие беріп, ізгі дәс­түрлер сабақтастығын жалғастырып ке­ле жатқан ел аналарын бірлесе жұмыс жасауға шақырды.





Ердос СӘРСЕНБЕКҰЛЫ
28 мамыр 2022 ж. 519 0