Кітапханашылар тәжірибе алмасты

Бүгінде білім саласына жауапты мамандар мектеп кітап­ханашысының мәртебесін көте­ру жөнінде жиі айтып жүр. Оқушыны сапалы оқулық және түрлі кітаппен қам­тамасыз ету мектептегі жауапты маманға жүктелген. Осы орайда, аудан бойынша барлық білім ошағының кітапханашылары Қалжан ахун ауылында бас қосты. Қасиетті ауылдағы №126 орта мектеп базасында аудандық «Кітап, мектеп, оқырман – рухани үштаған» та­қы­рыбында аудандық семинар өтіп, оған аудандық білім бөлімінің әдіс­кері Жанат Орынбаева, сала мамандары мен меймандар қатысты.

Тәулік бойы жүзеге асқан аудандық семинар жұмысы меймандардың «Буккроссинг» жобасын танысуымен басталды. Сонымен бірге арнайы тре­нингте әрбір мектеп кітапханашысы бір-біріне жылы лебізін жеткізіп, жұмыс барысында орын алған қызықты естелігімен бөлісті.

Семинарда аудандық білім бөлімінің әдіскері Ж.Орынбаева сөз алып, семинар жұмысына сәт­ті­лік тіледі.
– Аудан көлемінде мектеп кітапха­на­шыла­рының семинары жыл сайын тұрақты түрде өт­кі­зіліп тұрады. Биыл Қалжан ахун ауылында тәр­жірибе алмасуға жиналып отырмыз. Ауданда 17 білім ошағында 21 кітапханашы жұмыс іс­тейді. Негізінен, мектеп кітапханаларының қо­рын­да 435 361 кітап бар. Әрбір оқу жылының басында оқулық, әдеби, ғылыми кітап қоры толық­тырылады. Білім беру ұйымдарында кі­тап­­тың жеткілікті болуы маңызды рөл ойнайды. Жауапкершілігі мол қызметте сапалы әрі тиімді бағытты ұстанып, баламен жұмыс жасайтын мектеп кітапханашыларының еңбегі ерекше. Біз әрқашан әріптестерімізге барлық жағынан қол­дау көрсетуге дайынбыз. Сала мамандарының біліктілігін арттыруға арналған семинар жұ­мы­сына сәттілік тілеймін, – деді бөлім әдіс­кері.

Құт дарып, бақ қонған Қалжан ахун елді мекенінің тарихына және «Оқуға құштар мектеп» жобасы бойынша атқарылған біршама жұмысқа №126 орта мектеп директоры М.Төлегенов тоқ­талды.

– Заманының көрнекті өкілі, дін қайраткері Қалжан ахун Бөлекбайұлының атындағы ауыл та­рихы тереңде жатыр. Дін қайраткерінің рухани құндылығы мен тағылымы мол жәдігерін ғалымдар зерттеу үстінде. «Көкілташ» медресесінде білім алған ғұлама сан саланы меңгерген. Қай кезде де жас ұрпаққа дара тұлғаны барынша дәріптей білуіміз керек. Өз кезегінде аудандық семинар өткізу барысында «Оқуға құштар мектеп» жо­басының негізгі бағыт-бағдарын жан-жақты көрсететін боламыз. Әріптестеріміздің жұмысы табысты болғай, – деді мектеп директоры.

Аудандық семинарда «Автор және оқырман» жобасы аясында «Жүректен жүрекке...» кітабы­ның авторы, Қазақстан Жазушылар және Журналистер Одағының мүшесі Ақтөре Ибрагимұлымен кездесу ұйымдастырылды. Кешті тізгіндеген мек­теп директорының тәрбие ісі жөніндегі орын­басары Самат Жұмаділ ақын өлеңдерінің құры­лымына, мазмұнына тоқталды. Ақынның шы­ғар­машылығына шолу жасалып, поэзия жан­ры бойынша жиналған жұртшылыққа мол мағ­лұмат берілді. Сыр-сұхбат алаңына айналған кеште ақынның өлеңдері оқылды. Сонымен бірге ауылдық клуб әдіскері Гүлжанат Сырғабаева Ақтөре Ибрагимұлының «Жүрегімнің жүрегісің» әнін шырқады.

– Қазақта «Ақын адамдардың шаттығы – өлеңі» деген сөз бар. Әрбір өлеңнің өзіндік жазылу тарихы болады. Ақын шығармашылығына құр­метпен қарайтын ойлы оқырманның жүрегінен жол табуға тырысады. Бала кезімнен өлең жазуға құштар болып, көп оқуға, тереңнен ізденуге ма­шықтандым. Барша құрмет көрсетіп жатқан ауыл халқына, мектеп ұжымына алғысымды айтамын. Алдағы уақытта сөзі кестелі, мағыналы өлеңдеріммен көпшілікті қуантамын деп сен­діремін, – деді жас ақын.

Аудандық семинардың кезекті бөлімінде қа­зақ тілі мен әдебиеті пәнінің мұғалімі Ақылбек Мықбаевтың жетекшілігімен Дулат Исабековтың 80 жылдығына орай «Гауһартас» повесі бойынша оқу сағаты өткізілді. Оқу сағатында көрерменге шығарманың көркемдік құрылымы таныстырылды. Бұдан кейін педагог ұйымдастырушы Ақжарқын Есназарова ағартушы Ахмет Байтұрсынұлының 150 жылдығына байланысты «Ұлт ұстазы» әдеби кешін театрландырылған қойылым түрінде көр­сетті. Ал «Азамат» дебат клубының жетекшісі Әкімжан Беккулиев «Кітаптан ғаламтор озды ма?» тақырыбында дебат ойынын дүниежүзілік мек­теп форматында өткізіп, семинарға қатысушы қонақтарды да пікір алаңына тартты. Мектеп кітапханашысы Перизат Әзірбек «Кітап оқуға құмарлық» конференциясында кітапхана жұмысының тиімді әдістері жайлы талқылап, мектеп кітапханашыларымен тәжірибе бөлісті.

Айта кетейік, аудандық семинар қорытындысы бойынша сала мамандары арнайы «Алғыс хатқа» ие болды.

Балтабай ОРДАБЕКОВ