Еңбек ардагерлері ардақталды
![](/uploads/posts/2022-09/medium/1664253868_img_2676.jpg)
«Қызылдихан» шаруа қожалығының қырманында бас қосқан сала ардагерлеріне шаруашылық төрағасы Алданберген Құлбаев атқарылып жатқан жұмыстарды атап өтті. Шаруашылық төрағасы бүгінде шаруа қожалықтың әлеуеті едәуір жақсарғанына тоқталып, биылғы егін жинау науқаны жоспарлы жүріп жатқанына тоқталды.
– Өздеріңіз осы шаруашылықтың дамуына елеулі еңбек еттіңіздер. Таңның атысы, кештің батысы дала қосында жүріп, еңбек дүбірін жаңғырттыңыздар. Ол кезеңдерде қазіргідей техникалар жоқ. Сондықтан барлық жұмыс қолдың күшімен атқарылды. Сондай еңбектің үлгісін көрсетіп, осы шаруа қожалықта қызмет етіп, жастарды еңбекке баулыдыңыздар. Бүгінде сол Сіздердің ізбасарларыңыз шаруашылық жұмыстарын атқарып келеді. Қазір шаруашылықтың жағдайы едәуір жақсарды. Жаңадан қырман салынды, жұмысшыларға қолайлы жағдай жасалуда. Одан бөлек, заманауи техникалар алынып, егін егу, жинау науқандары жаңа техникалардың көмегімен жылдам жүзеге асуда. Міне, осындай жетістіктерге жетуде еңбек ардагерлерінің сүбелі үлесі мол. Сондықтан Сіздерге деген құрметіміз ерекше, – деді Алданберген Бодыбайұлы.
Расында, бүгінде іргелі шаруашылықтың әлеуеті жақсы. Жаңа қырманда әкімшілік кеңсе, жұмысшыларға арналған асхана бар. Жаңа қойма да салынған, астық тазартатын құрылғылар орнатылған. Бүгінде шаруа қожалықта 100-ден аса қызметкер жұмыс істейді. Қазіргі таңда науқан қызу жүріп, қырман күрішпен көмкерілуде.
Қырман басында еңбек ардагерлері өздері қызмет атқарған жылдарды, сол кезеңдердегі ауыртпашылықтарды еске алды. Шаруашылықта прораб болған Төлеу Сүлейменов, бас бухгалтер Серікбай Кенжебаев, бас инженер-механик Байырбек Әмірбеков, механик Өтепберген Әбілов, бас гидротехниктер Тахир Ерғалиев, Марат Омаров, агроном-гидротехник Бахыт Күшікбаев, бригадир Зайдағали Жүсіпбайұлы, қойма меңгеруші Сайфулла Анасов, диспетчер Нұрәлі Мешітбаев, бас мал дәрігері Бекзат Мұсағұловтар «ХХІ партсъезд» совхозындағы еңбектегі естеліктерімен бөлісті.
– Біз жастайымыздан еңбекке ерте араластық. Осы ауданның өсіп-өркендеуі жолында қандай жұмыс болса да қашпадық. Өміріміздің бір белесінде осы «Қызылдихан» шаруа қожалығында қызмет етіп, сала жұмысына серпін бердік. Алдекең айтқандай, біздің кезде қазіргідей техникалар жоқтың қасы. Десе де бар техниканы пайдаланып, осындағы елдің ризық-несібесін қамдай білдік. Таң атпастан диқандар кетпенін арқалап, егістік басында жүреді. Күрішті күтіп-баптай біліп, одан мол өнім алуды қамтамасыз етті. Ал бітік шыққан егінді ысырапсыз қамбаға түсіруде шаруашылық қызметкерлері еш тыным таппайтын. Ол кездердің ауыртпашылығы көп еді. Бірақ еңбекпен есейген біздер сол қиындықтарды еңсере білдік, – дейді сала ардагері Төлеу Сүлейменов.
Сондай-ақ, басқосуға қатысқан өзге де еңбек ардагерлері еңбек дүбіріндегі қызықтарын айтты. Мереке қарсаңында қырманда болған сала ардагерлеріне шаруашылық тарапынан сый-құрмет жасалды. Еңбек ардагерлері өз ризашылықтарын білдірді.
Жалпы, дала дүбірін еңбекпен қыздырған ардагерлердің өнегелі өмір жолдары – кейінгіге өнеге. Олай дейтініміз, бүгінде жастар жағы «ауырдың үстімен, жеңілдің астымен» жүруге бейім. Ал бүгінде бейнетінің зейнетін көріп отырған ардақты жандар бала жасынан еңбекпен есейіп, қандай қиындық болса да еңсере білген. Сондықтан да сала ардагерлеріне деген құрмет ерекше. Бұл ретте, шаруашылық осындай ізгі іс-шараға ұйытқы болып, еңбек ардагерлерін ардақтады.
Ердос БЕРКІНБАЕВ