Егін еккеннің еңсесі биік

«Қызылдихан» шаруа қожалы­ғында биылғы егін жинау науқаны күрішші Садық Махановтың егіс­тігінен бас­тау алды. Диқанға 45 гектар жер тиесілі. Өзіне бекітілген жерге ала жаздай күтім жасап, мерейлі сәтке де жақындап қалды. Енді егін ысырапсыз жиналса, жылдағыдай қамбаның астықпен көмкерілуіне ерекше үлес қоспақ.

Жалпы, «Қызылдихан» шаруа қо­жа­лығында биыл 860 гектар жерге егін егілді. Оның ішінде егінге орақ түскен №2 бригадаға 300 гектар жер тиесілі. Өндірістік бригадир Кенже Айтбаев бұл жылы да диқандар қамбаға мол өнім құюға бекініп отыр­ғанын жеткізді.

Шаруашылықтың егінге орақ са­лу рәсіміне шаруа қожалық төра­ғасы Алданберген Құлбаев, еңбек ар­дагерлері мен қызметкерлер қа­тысты.

– Танапта еңбек еткеннің ме­рейі үстем болады. Даңғайыр ди­қан Ыбырай Жақаевтан «Күріш егуден рекордтық көрсеткішке же­туіңіздің сыры неде?» деп сұра­ғанда даңқты күрішші «Еңбек, еңбек, тағы да еңбек» деп айтқан екен. Осыны білетін шаруашылық диқандары қажырлы жұмыс істеп, егіннің бап-күтімін жасады. Біз ата кәсіпті жалғастыру үшін аға ұрпақ пен жастардың арасындағы сабақтастықты қалыптастыруымыз қа­жет. Осыған сәйкес жас күріш­шілердің егін егуіне мүмкіндік жасаудамыз. Шаруашылықтың жас еңбек­керлері өздеріне артылған сенімнен шығып, жақсы жетістіктерге жетуде. Бұл қожалық жұмысының ілге­рілеуіне септігін тигізеді. Сондай-ақ егін жинауда біздің техникаларымыз сақадай сай. Шаруашылықта барлық техника жаңартылды, – деді «Қызылдихан» ШҚ-ның төрағасы А.Құлбаев.

Мұнан соң еңбек ардагерлері де өздерінің тілек­тестіктерін білдіріп, астықтың мол болуына баталарын бер­ді.

Ердос БЕРКІНБАЕВ