Жаңа жобалар жүзеге асуда
Аудан әкімі Мұрат Ергешбаев шалғай орналасқан Жетікөл ауылына арнайы келіп, жаңа егін алқаптарының жұмысымен танысты.Биыл елді мекенді аяқ сумен қамту мақсатында облыстық бюджеттен «Жыңғылдыкөл», «Хозцентр», «Военторг» каналдарын механикалық тазарту жұмыстары жүргізіліп, нәтижесінде Жетікөл ауылына 30 жылдан кейін аяқ су келген еді. Соның негізінде «Жетікөл Жері» ЖШС күздік дала жұмыстарын жүргізу және егін егу жұмыстарын бастаған болатын. Бүгінде аталған шаруашылық украиндық ғалымдардың қатысуымен 200 гектар жерді егін алқабына дайындап, тегістеу жұмыстарын жасауда. Егін алқабына келетін каналдың аяқ бөлігіне де тазарту және кеңейту жұмыстарын жүргізді.
Егіс алқабы мен тазартылған каналдарды аралаған аудан әкімі Мұрат Нәлхожаұлы талмай еңбек етіп жатқан шаруалармен кездесіп:
– Бұл – еліміз бен жеріміз үшін жасалып жатқан мүмкіндік әрі қуаныш. Өздеріңіз осы ауылдың көркеюіне тер төгіп, қараусыз қалған жерлерді қайта жаңғыртуға елеулі үлес қосудасыздар. Шаруашылықтың әлеуетін пайдаланып, ғалымдардың тәжірибесін үйренулеріңіз қажет. Бүгінде ауылда жаңа жұмыс орындары ашылуда. Сәйкесінше, халықтың әлеуеті де артады. Сіздердің еңбектеріңіз бен қажыр-жігерлеріңізге алғыс білдіремін. Іске сәт! – деді.
Жалпы, «Жетікөл Жері» ЖШС биылғы жылы 200 гектар аумаққа бидайдың күздік түрінің 4 сортын егу, 10 гектар жерге 4 түрлі алма сортымен алма бақ орналастыру, жем өндіру цехын ашу секілді жұмыстарды жоспарлап отыр. Ауыл әкімдігі кәсіпкерлікті дамытып, ауыл шаруашылығы саласын өркендетіп, жаңа жұмыс орындарын ашуды басты назарда ұстайды.
Жетікөл ауылының әкімдігі
