Суды үнемдеуге басымдық беріледі

Соңғы жылдары ауыл шаруашылығы саласын жаңғырту үшін жаңадан реформа жүргізу қолға алынып келеді. Қазіргі таңда аяқ су тапшылығына тап болған жергілікті халық егін егудің машақатын көрмеуі тиіс. Сондықтан аудан әкімі Мұрат Ергешбаевтың тапсырмасына сәйкес, аудандық ауыл шаруашылығы бөлімінің басшысы Нұрбол Жұмабеков Аманкелді, Жетікөл, Айдарлы ауылдарыына барып, шаруалармен кездесу өткізді. Мұнда аяқ су жүретін каналдарды тазарту, бақша өнімдерін егу жұмыстарын қолға алу мәселелері талқыланды.

Жалпы, үш елді мекен бойынша 2000 гектар жерге суды аз қажет ететін дәнді-дақылдар мен мал азы­­ғын егу жоспарланған. Алдағы уа­қытта Аманкелді ауылындағы «Қо­сапан» Жетікөл ауылындағы «Жың­ғылдыкөл» мен «Хозцентр», Ай­дарлы ауылындағы «Ақтам» су арнасын тазарту үшін бюджет есе­бінен қаржы бөлінген. Егін мау­сымы басталған сәтте үш елді мекенде жоңышқа, бидай, картоп, жуа, сәбіз, қауын-қарбыз егу қолға алынады. Өзбекстан елінен келген агроном мамандар егін шаруашылығына арналған жерлерді тиімді мақсатта пайдалану тетігі бойынша шаруалармен тәжірибе алмасатын болады.

– Бірнеше жылдан бері су тап­шылығы салдарынан шар­уа­лар жұ­мы­сы құлдырап кеткені рас. Сыр­ салысымен қатар, бақша өнім­­де­рін егуді жетілдіру күн тәр­ті­бінен түспейді. Бүгінде ау­дан­дық ша­руашылығы бөлімі елді мекен­дердегі кәсіпкерлер және егін­шілермен бірге дәнді-дақылдар мен мал азығын егуге қолайлы жерлерді анықтауда. Әри­не, қайта жаңғыртудан өткен су арналарының бойында бақша өнім­дерін егу қолайлы. Биыл да өңірде аяқ су тапшылығы болатыны болжануда. Сондықтан мол өнім беретін дәнді-дақылдарды егу маңыздылығын жой­­майды. Бұл ретте, жоғарыда атал­­ған ауылдарға инвестор тартып, ауыл шаруашылық өнімдерінің көле­мін көбейтуге күш саламыз, – дейді аудандық ауыл шаруашылығы бөлімінің басшысы Н.Жұмабеков.

Аудан әкімдігі әлеуметтік ма­ңызы бар азық-түлік бағасын тұ­рақтандыру бойынша әр ауылда зерделеу жұмыстарын жүргізуде. Осы зерттеудің негізінде Іңкәрдария ауылының тұрғындарының картоп дақылын егу мақсатында кооператив жүйесіне бірігуге арналған ұсынысы қолдау тапты. Өз кезегінде аудан әкімінің бастамасымен об­лыстық қо­ғамдық кеңестің мүшесі, «Егінші» серіктестігінің директо­ры Ерұлан Өмірсеріков Іңкәр­да­рия ауылы бо­йынша тың жоба дайындады. Егер жоба мемлекет тарапынан қолдау тапқан жағдайда Мемлекет басшысы Қасым-Жомарт Тоқаев­тың әр отбасының табысын арт­тыруға және «Егістіктен-сөреге дейін» тапсырмасын орын­дауға мүмкіндік туа­­ды.

Сонымен бірге, жо­ба аясында «Батыс Еуропа – Батыс Қытай» магистральды жолының бойында бақша өнімдерін сатуға арналған сауда ала­ңы салынады деп күтілуде. Тиісінше, халықты сапалы, табиғи өніммен қам­туға тиімділігі зор.

Балтабай ОРДАБЕКОВ