Құттықтау
Құрметті аудан тұрғындары!Қадірлі тіл жанашырлары!
Сіздерді Қазақстан халқы тілдері күні мерекесімен шын жүректен құттықтаймын!
Бұл мереке «Тілі жоғалған ұлттың өзі де жоғалады» деп халқымыздың тағдыры үшін, тілі үшін күрескен, қазақ әліпбиінің негізін салған Алаштың ардақтысы Ахмет Байтұрсынұлының туған күнімен тұспа-тұс тойланады. Сондықтан осынау атаулы күнге тіл мерекесін үйлестіріп, атап өтудің маңызы мен мәні зор.
Бүгінгі таңда елімізде жүргізіліп отырған сындарлы тіл саясаты – толерантты тілдік орта қалыптастыруда аса маңызды қоғамдық-саяси, әлеуметтік-мәдени құндылықтардың бірі. Еліміздегі түрлі этнос өкілдерінің тату-тәтті, ынтымақ-бірлікте өмір сүруіне үйлесімді тіл саясаты тікелей ықпал етеді. Тәуелсіздік алған уақыттан мемлекеттің сындарлы саясатымен мемлекеттік тілдің қолданыс аясын кеңейтуге, өзге этностардың тілдерін сақтап қалуға, оқып-үйренуге қолдаулар көрсетіліп келеді.
Мемлекет басшысы Қасым-Жомарт Кемелұлы Тоқаев өзінің «Сындарлы қоғамдық диалог – Қазақстанның тұрақтылығы мен өркендеуінің негізі» атты алғашқы Жолдауында «Еліміздегі этникалық топтардың тілі мен мәдениетін дамытуға жағдай жасай береміз. Қазақ тілінің мемлекеттік тіл ретіндегі рөлі күшейіп, ұлтаралық қатынас тіліне айналатын кезеңі келеді деп есептеймін. Бірақ мұндай дәрежеге жету үшін бәріміз даңғаза жасамай, жұмыла жұмыс жүргізуіміз керек. Сондай-ақ тіл үлкен саясаттың құралы екенін де ұмытпаған жөн, – деп атап өткені белгілі. Бұл тіл саясаты мәселесінде бізден асқан ыждағаттылықты талап етеді.
Бүгінде халықаралық «Қазақ тілі» қоғамының аудандық филиалымен бірлесе ана тіліміздің мерей-мәртебесін арттыру мақсатында ауқымды жұмыстар қолға алынды. Барлық мекеме, мектеп, балабақшада арнайы іс-шаралар өткізілуде. Біздің басты мақсатымыз – қазақ тілінің қолданылу аясын кеңейту.
Халқымызда «Тіл – ұлттың тірегі» деген салмақты сөз бар. Ендеше, тірегімізге тіреу болайық, Тәуелсіздігімізге сүйеу болайық. Мемлекеттік тіліміздің мәртебесі арта берсін! Қазақстан халқы тілдері күні құтты болсын!
Құрметпен, Мұрат Ергешбаев,
Сырдария ауданының әкімі
Сырдария ауданының әкімі
