Шағандықтар егін егуге кірісті

Белгілі жырау Алмас Алматов «Ке­тіскен досың келсін десең, кетпен ал да егін ек, я дән шақырады, я дәм шақырады» деген екен. Сол айтқандай, ризық-несібені жерден іздеуші диқан қауымы осы күні егін егу жұмыстарын бастап кетті. Олар­дың қатарында аудандағы іргелі шаруашылық – «Шаған Жер» ЖШС-нің еңбеккерлері де атыздыққа ал­ғаш­қы дәнді септі.

Биыл Жеңісбек Сыздықов басқаратын се­рік­­тестік 2800 гектар жерге Сыр дақылын егуді жос­пар­лаған. Бүгінге дейін 500 гектар бидайды, 100 жаңа жоңышқаны егіп болып, күтіміне кіріскен. Ал сәуір айының үшінші онкүндігінен бастап Сыр дақылын егуді бастаған. Бұл іс-шараға ауылдың еңбек ардагерлері қатысып, егіннің мол болуына тілектестігін білдірген.

– Дала еңбеккерлерінің еңбегі ұшан-теңіз. Не­гізі күрішті диқанның баласы дер едім. Өйткені күрішші дән сепкеннен кейін 40 күн бойы оны «суға тұн­шықтырып алмайын, күнге күйдірмейін» деп тынбастан тер төгеді. Атыздықта отақ, шиін шығармау үшін жанталасады. Мол өнім алуға үміт­теніп, бар күш-жігерін салады. Дән жерді жарып шыққан соң шілденің шіліңгір ыстығында оны баптау, қалың қамысты жарып өтіп, уақытылы суару – осының бәрі нағыз еңбек. Ел ырзығы осы жүзін күн сүйген диқандардың маңдай тер жұ­мысына байланысты, – деген шаруашылық төр­а­ғасы Ж.Сыздықов егін егуге барлық жағдай жа­салғанын атады.

Егістікте агротехникалық талаптар сақтал­ған. Техникалар да сайланған. Шағандық еңбек­кер­лер нарық заманына сай бейімделіп те ке­леді. Өндірісті әртараптандырып, оны кеңейту бағы­тында ауқымды жұмыстарды қолға алған. Атап айтқанда, жылыжай жұмысы, шағын маркет ха­лыққа қызмет көрсетуде. Одан бөлек те жүзеге асы­рылатын жобалар бар.

Серіктестік директорының орынбасары Әб­­ді­разақ Сәдуов биылғы алғашқы дән №6 бри­га­даның күрішшісі Рахат Мұғаловқа тиесілі жерге себілгенін айтты. Қазіргі таңда еңбеккерлер нау­қандық жұ­мыстарды сәтті аяқтауға талпынған. Ал одан кейін Сыр салысының бап-күтіміне кірісіп, алтын күзде мол өнімнен үмітті.
Пайғамбарымыз (с.ғ.с.) еңбек адамының қолын көтеріп «Алла тағаланың мейірімі, разылығы осы қолы лас болса да табысы таза болған адамдарға болсын» деп ерекше құрмет көрсетіпті. Ендеше, елдің ризық-несібесін өндіруші еңбеккерлердің ең­бегі қайтсын деп тілейміз. Шағандықтардың ме­рейі үстем болсын!

Ердос БЕРКІНБАЕВ