Тіршілік тынысы Tirshilik-tynysy.kz ақпараттық агенттігі
» » Алғаусыз алғыс айтайық

Алғаусыз алғыс айтайық

Елімізде көктемнің алғашқы күні Алғыс айту мерекесі ретінде тойланады. Қыстан қысылып шық­­қан халық бір-біріне риясыз көңілін, шексіз алғысын жеткізіп, жайма­шуақ мезгілдің алғашқы күнін ерекше көңіл-күймен қарсы алады.

«Қарғыс алма, алғыс ал» деген тәмсілді берік ұстанған халықтың бір-біріне бары үшін, бәрі үшін рақмет айтып, мейірім отын тұтатқаны орынды-ақ. Десек те Алғыс айту күніне байланысты айтылуы тиіс мәселе бар. Күні бүгінге дейін айтулы күннің не­гізгі мәні мен мақсатын білмейтіндер кез­деседі. Иә, алғыс айтып, бір-бірімізге ізгілік тілеудің артықтығы жоқ, бірақ 1 нау­рыздың мереке ретінде белгіленуінің аста­рында үлкен мән бар. Бұл – өзге ұлт өкілдерінің ауыртпашылыққа толы қиын-қыстау кезең­де қолындағы бір үзім нанын бөліп берген, өз үйінің бір бұрышынан пана берген кең­пейіл қазақ халқына Алғыс айту күні.

Айтулы мерекенің тарихы 2016 жылдан бас­тау алды. Бұл туралы Елбасы Нұрсұлтан Назарбаев: «Қазақстан халқы Ассамблеясы құрылған күн – 1 наурызды жыл сайын барлық этностардың бір-біріне мейірбандық танытып, ол адамдарды өз туғанындай қабылдаған қазақтарға алғыс айту күні ретінде атап өту әділетті болар еді. Ол күн бізді бұрынғыдан да гөрі жақындастыра түспек. Бұл күн мейірім­діліктің, бүкіл қазақ­стандықтардың бір-біріне деген достығы мен махаббатының жарқын мере­кесі бола алар еді», – деген еді.

Алғыс айту күні – еліміздегі тыныштық пен үндестік, бейбітшілік пен келісім сая­­сатының салтанатты күні. Тәуелсіз Қазақ­станды құру жолында аянбай тер төккен ел азаматтары бір-біріне құрмет білдіреді. Қазақ халқы – жатқа да, жақынға да құшақ ашқан мейірбан халық. Халқымыз кең пейіл, дархан көңілмен қазақ жеріне келген ұлттарға қонақжайлылық танытты, бірлік жолын ұстанып, бір шаңырақ астына топтаса білді. Қазақтың дархандығы мен жомарттығына өзге этнос өкілдерінің айтар алғысы шексіз. Көктемнің алғашқы мерекесі болып табылатын атаулы күн – мейірімнің, шынайы достық пен ыстық ықыластың жарқын мейрамы.


Аружан МҰХАНБЕТҚАЛИ
01 наурыз 2022 ж. 529 0