Еңбектері еленді
Ауданның әлеуметтік-экономикалық дамуы мен аудан бюджетінің артуында салық органдарының алатын орны ерекше. Білікті басшы, іскер ұйымдастырушы Ашраф Жүсіпов басқаратын аудандық мемлекеттік кірістер басқармасы салық базасын ұлғайту мақсатында ауқымды жұмыстарды атқарып келеді. Егемендік мерекесіне орай сала қызметкерлері бас қосып, атқарылған жұмыстар мен алдағы міндеттерді саралап, басқарма басшысының қолынан мерекелік марапаттарға ие болды.Мерекелік іс-шара Мемлекеттік Гимн орындаумен басталды. Мұнан соң аудандық мемлекеттік кірістер басқармасының басшысы Ашраф Жүсіпов жиналғандарды Тәуелсіздік күні мерекесімен құттықтады.
– Тәуелсіздіктің 30 жылдығы – Қазақстан тарихындағы айтулы күн. Тәуелсіздік – мемлекеттіліктің берік негізі, еркіндіктің, тұрақтылықтың және ұлтаралық келісімнің символы. Біздің егемендігіміз әрбір қазақстандықтың өз елі мен жерінің игілігі үшін атқарған қажырлы еңбегімен, әрқайсымыздың дамыған және қуатты мемлекетте өмір сүруге деген ұмтылысымыздың арқасында нығая түседі. Салық органдарының барлық қызметкерлерін егемендігіміздің мерейлі мерекесімен құттықтап, қызметтеріңізге табыс тілеймін, – деді басқарма басшысы.
Іс-шарада басқарманың бас маманы Ж.Мусаева азаттық тақырыбына арналған баяндама жасап, егемендік жылдарындағы Сыр өңіріндегі жасампаз жетістіктерді талдады. Сондай-ақ, аудандық мәслихаттың депутаты А.Ибрагимұлы салық органдарының қалыптасуы мен дамуы туралы сөз сөйлеп, сала қызметкерлеріне жауапты жұмыста жеміс тіледі.
Атап өту керек, мерекелік басқосуда облыс әкімінің «Алғыс хатымен» басқарманың бөлім басшысы А.Маханбеталиева, басқарманың бас маманы Ж.Кушкарбаева, Қызылорда облысы бойынша Мемлекеттік кірістер департаментінің «Құрмет Грамотасымен» басқарманың бас маманы Ж.Мусаева мен Ж.Төлегенова марапатталды. Сондай-ақ, басқарманың бөлім басшысы Б.Ордабаевтың ата-анасы К.Ордабайұлы мен Л.Дербісәліқызы өз перзенттерін білімді де білікті маман ретінде тәрбиелегені үшін Қызылорда облысы бойынша Мемлекеттік кірістер департаментінің «Алғыс хатын» иеленді.
Ал аудандық мемлекеттік кірістер басқармасы басшысы А.Жүсіповтің «Алғыс хаты» жеке кәсіпкер Ұ.Жамансариева, Г.Сәрсенбаева, А.Абдуомар, Л.Мекебаева, басқарма қызметкері А.Досығұлова, басқарма мұрағатшысы Н.Баймахановқа берілді. Мұнан бөлек, С.Сейфуллин, Ақжарма, Шіркейлі ауылдарының салықшылары Э.Ұзақбаева, Н.Атымтаев, С.Шайзадаев алғыс арқалады. Қызылорда облысы бойынша мемлекеттік мүлік жəне жекешелендіру департаментінің Сырдария ауданындағы шаруашылық меңгерушісі Н.Нұрманов пен қызметкері Н.Байбарақова да марапат алғандар қатарынан көрінді.
«ТТ» ақпарат
