Үлкендер жолы – ұлылық
Жас ұрпақты мектеп тарихымен, зейнеткер ұстаздардың еңбегімен таныстырып, оқушыларды ұстаз бойындағы құндылықтарды үлгі етіп, құрметтеуге үйрету мақсатында №210 О.Әбілпаттаев атындағы мектепте «Үлкендер жолы – ұлылық, ұрпағы жүрер ұғынып» тақырыбын арқау еткен ардагер ұстаздармен кездесу кеші өтті. Әдемі безендірілген сахна, көтеріңкі көңіл-күй, сыйластықтың жарқын үлгісі, жүрек түбіндегі естеліктер – кештің негізі болды.Кездесудің қадірлі қонақтары, биыл құрметті еңбек демалысына шыққан – Әсем Мәлікқызы, Салтанат Сансызбайқызы, Үміт Дабылқызы.
Ауданның білім беру саласында өзіндік орны бар Әсем Мәлікқызы 1980 жылдан еңбек жолын №210 мектепте аға тәлімгер болып бастаған. Үш жылдан кейін орыс тілі мен әдебиеті пәні мұғалімі, кейінірек мектеп директорының оқу ісі жөніндегі орынбасары, 2013-2021 жылдары мектеп директоры болып абыройлы қызмет еткен. Саналы ғұмырын бала тәрбиелеу ісіне арнаған ардақты жан өткен күндерді «Бар өмірім осы №210 орта мектепте өткен екен» деп есіне алады. Еңбегі ел арасында еленген ұлағатты ұстаз «ҚР Білім беру ісінің құрметті қызметкері» төсбелгісімен, «Құрмет грамотасымен», облыс әкімінің «Алғыс хатымен» марапатталғанын айтып өтуіміз керек. Ал Салтанат Сансызбайқызы – өте білікті әрі талапшыл ұстаз ретінде құрмет төрінде. Білім ордасында ұзақ жыл бойы орыс тілі мен әдебиеті пәнінен сабақ берген мерейлі мұғалім мектеп тренері, мектептің кәсіподақ ұйымының төрайымы болып қызмет атқарған. «Білім беру ісінің құрметті қызметкері» төсбелгісінің иегері, Халықаралық ғылым мен білімді қолдау орталығының «Құрмет» медалімен, ҚР білім және ғылым министрлігінің «Құрмет» грамотасымен марапатталған ардақты ұстаздың есімі Қызылорда облысының үздік педагогтарының «200 жылдық тарихы бар Сыр өңірі педагогикасындағы қадірлі 200 есім» антологиясына енген. Үміт Дабылқызы да ұстаздықты ұлылық деп білген ардақты жандардың бірі. Ол талай балғынның өнерін шыңдап, әнге деген құштарлығын оятқан, ұзақ жыл музыка пәнінің мұғалімі қызметін атқарған. Ұжымда әркез сыйлы бола білген аяулы ұстаз «Үздік жетекші» номинациясымен, «Құрмет грамотасымен», ҚР «Үздік тәлімгер» төсбелгілерімен марапатталған. Талай шәкіртін республикалық, халықаралық сайыстарға дайындап, еңбегінің жемісін көріп жүрген жан.
Мектеп мұғалімдері, жас мамандар мен қонақтар және 11-сынып оқушылары қатысқан кездесу кеші еркін форматта өтті. Мектептің ардагер ұстаздары еңбек жолынан, ұстаздық қызметтің қыры мен сырынан, өткен күннің еншісіндегі естеліктерінен сыр шертсе, оқушылар мен әріптестері ақ тілек пен ыстық ықыласын білдірді. Сырлы сұхбатқа құрылған кеште әсерлі әңгіме де, болашаққа бағдар да, тәлім мен тәрбие де, ақ бата да айтылды. Бейнетінің зейнетін көріп отырған аяулы ұстаздар Қазақстанның түкпір-түкпірінде білім алып жүрген шәкірттерінің онлайн құттықтауын көріп, марқайды.
Халық даналығында «Ұлылықтың басында ұстаз тұрар» делінген. Кімнің де болмасын үлкен өмірде жеткен жетістігінің ұшар шыңында ата-анамен қатар ұстаздың тұратыны анық. Әріп пен жазуды үйретуден бастаған мұғалімдер бала болашағына бағдар сілтеп, өмірлік азық болар кеңестерін де аямайды. Онысын бір міндет етпей, жеңіске жетсең шынайы қуанып, мектептен алыстап кетсең де, ұдайы тілекшің болып қалатын да осы мейірбан жандар.
«Мұғалімнің мерейін арттыратын шәкірт болса, ұстазды ұлықтап, құрметтеу де оқушының асыл парызы. Бұл кеште құрмет төрінен көрінген ұстаздың да, ұстазы мақтауын асырған шәкірттің де мерейі үстем болды. Сырлы сұхбатқа құрылған кештің екі сағатқа созылғанын аңғармай да қалыппыз» деген мектеп директорының оқу ісі жөніндегі орынбасары А.Жаңабергенова мектеп ұжымы атынан құрметті қонақтарға қазақы дәстүрмен сый-сыяпат табыстады. Ұстаздар Тәуелсіздіктің баға жетпес құндылық екенін айтып, егемен елдің ертеңі – жастарымыздың болашағы жарқын болуын тіледі.
Аружан МҰХАНБЕТҚАЛИ
