Сырдарияда дәрі-дәрмек қоры жеткілікті

Бүгін аудан әкімі Талғат Дүйсебаев Тереңөзек кентіндегі дәріханаларды, кәсіпкерлік нысандар мен сауда орындарын аралап, карантиндік талаптардың сақталуына мән берді. Аудан басшысы алдымен дәріханаларға барып, дәрі-дәрмек қорынының жеткілікті болуына көз жеткізді.

– Қазіргі жағдайды білесіздер. Ауданның «қызыл» аймаққа енуіне байланысты бірқатар шектеу шаралары енгізілді. Карантиндік талаптарды сақтамасақ, індет жұқтырғандар саны күн санап артуда. Осы орайда, халыққа дәрі-дәрмек жеткілікті болуы қажет. Өткен жылғы жағдайлар орын алмас үшін ең қажетті деген дәрілердің қоры жасақталып тұруы тиіс. Осыған мән беріңіздер, – деді аудан басшысы дәріхана қызметкерлеріне.

Бүгінгі таңда ауданда 13 дәріхана қызмет көрсетуде. Оның ішінде, Тереңөзек кентінде 6 дәріхана бар. Аудан әкімдігі тарапынан қажетті дәрі-дәрмек қорына күнделікті мониторинг жүргізілуде. Қазіргі таңда ауданда дәрі-дәрмек қоры жеткілікті.

Сонымен қатар, аудан әкімі сауда орындары мен аудан орталығындағы коммуналдық базарға барып, көпшілік жерде карантиндік талаптарды сақтау керектігін ескертті.