Сырдариялық ақын республикалық мүшәйраның жүлдегері атанды

Сырдария ауданының тумасы Ақтөре Ибрагимұлы республикалық жазба ақындар мүшәйрасының жүлдегері атанды. Жас ақын Ұлы Жеңістің 75 жылдығы аясында Кеңес Одағының Батыры Тәйімбет Көмекбаевтың 100 жылдығына орай ұйымдастырылған жыр бәйгесінің қорытындысы бойынша жүлделі ІІІ орынды иеленді.

«Ұмытылмас ерлік, өшпес даңқ» атты республикалық жазба ақындар мүшәйрасы карантин талаптарына сәйкес онлайн форматта ұйымдастырылды. Мүшәйраға облыстардан 20-дан астам ақын қатысып, өз туындыларын ұсынды.

Талапкерлердің өлеңдеріне ақын, Қазақстан Жазушылар Одағының Қызылорда облыстық филиалының төрайымы Қаршыға Есімсейітова, ақын, Қазақстан Жазушылар және Журналистер Одағының мүшесі Дүйсенбек Аяшұлы, жырау Берік Саймағамбетов баға берді.

Сырдариялық ақын Ақтөре Ибрагимұлын кезекті жетістігімен құттықтап, шығармашылық сәттілік тілейміз!