Кәсіпкерлік саласы қарқынды дамуда

Бүгінде аудан бойынша кәсіпкерлік саласын дамыту негізі қалыптасып, жұмыссыздық деңгейін төмендету бағытында тиісті шаралар атқарылуда. Нарықтық экономиканың талаптарына сәйкес, халықтың әлеуметтік тұрмыс-ахуалын жақсарту бас­ты орынға қойылған. Сондықтан қазіргі таңда кәсіпкерлікке бетбұрыс жасау маңызды. Кез келген азамат кәсіпкерліктің түпкілікті құрылымын зерттей отырып, табыс көзін арттыруға бейімделу керек. Ауданда бизнес жобаны мақсатты түрде игеріп, өз алдына дербес кәсіп көзін ашуды қолға алған азаматтар қатары жетерлік. Осы орайда кәсіпкерлік саласында өткен жылы атқарылған жұмыстарға тоқталып өтсек.

Негізінен аудан бойынша 2020 жылдың 1 қаңтарына дейін 2307 шағын және орта кәсіпкерлік субъектісі тіркелген. Оның ішінде жұмыс істеп тұрған кәсіпкерлік субъектілерінің саны 2107-і құрайды. Айта кету керек, өткен жылдың осы кезеңімен салыстырғанда жұмыс жасап тұрған кәсіпкерлік субъектілерінің саны 15 процентке өскендігі байқалады. Бұл ретте 2019 жылдың қаңтар-желтоқсан айларында 447 кәсіпкерлік субъектісі тіркеліп, тиісінше жұмыс жасауда. Өз кезегінде аудан кәсіпорындары 5658 млн теңгенің өнімін өндіріп, 3816 адам жұмыспен қам­тылған.

Сондай-ақ ауданда «Еңбек» нәтижелі жұ­мыспен қамту және жаппай кәсіп­кер­­лік­ті дамыту» бағдарламасының екінші бағыты бойынша өткен жылы жүйелі жұ­мыс жалғасын тапқан. Нақтырақ айтқанда, «Аграрлық несие серіктестігі», «Ауыл шар­уашылығын қаржылай қолдау қоры» және «Өңірлік инвестициялық орталығы» ЖШС арқылы құны 462,1 млн теңгенің 156 жобасы несиелендірілген. Аталған бағдарлама аясында стартап жаңа бизнес идеяларды іске асыру мақсатында 200 адамға 86,8 млн теңге көлемінде мемлекеттік грант берілген. Грантқа қол жеткізген жекелеген азаматтар түрлі бағытта кәсіпкерлік көкжиегін кеңейтіп, табыс көзін еселеуде. Халыққа тиімді жобаның игілігін өз мүддесіне жаратқандар бизнесін кеңейтуге мүмкіндік алады. Ең бастысы, кәсібін жете меңгеріп, тұтынушыға сапалы қызмет ұсынуда.

Ал «Микробизнес-Қызылорда» бағдар­ла­масы бойын­ша өткен жылы құны 152,2 млн теңгенің 38 жоба­сы кеңестің оң шешімін алып, қаржыландырылған. «Бизнестің жол картасы-2020» бизнесті қолдау мен дамытудың мемлекеттік бағ­дарламасы шеңберінде барлығы 237,7 млн теңгенің 19 жобасына қолдау көрсе­тілген.

Сонымен қатар несие бойынша па­йыз­дық мөлшерлемені субсидиялауға жал­пы құны 221,2 млн теңге болатын 6 жоба ұсынылып, субсидияланған. Несие­нің ішінара кепілдендіру бағыты бо­йынша құны 13,4 млн теңге болатын 3 жобаға кепілдік ұсынылған. Гранттық қаржыландыру бойынша 10 кәсіпкердің жалпы құны 3,1 млн теңгені құрайтын жобасы қаржыландырылды.

«Қарапайым заттар экономикасы» бағ­дарламасының субсидиялау тетігі шең­берінде өткен жылы нақты жұмыс жүр­гізілген. Қалжан ахун ауылындағы А.Аяпова жетекшілік ететін «Димаш» фермерлік қожалығы 15,8 млн теңгені құрайтын «Жылқы малын көбейту» жобасы, Аманкелді ауылындағы «Сейдалиев Б» ШҚ құны 3,3 млн теңгені құрайтын «Мал шаруашылығын дамыту (ірі қара)» жобасы, Айдарлы ауылындағы «Қадыр Ата» ШҚ құны 20,0 млн теңгені құрайтын «Мал шаруашылығын дамыту (жылқы)» жобасы «Аграрлық несие корпорация­­сы» АҚ арқылы қаржыландырылған.

Тұр­ғындардың кә­сіп­керлік сауатын арттыру мақсатында жан-жақты бағыт-бағдар беріліп, кәсіпкерлік әліппесі үй­ретілген. Соның негізінде аудандық «Атамекен» кәсіпкерлік пала­тасы арқылы «Биз­нес-Кеңесші» курсын 218 адам, «Бас­тау-Бизнес» курсын 230 адам оқып, сертификат алған.

Халықтың тұрмысына тікелей әсерін тигізетін кәсіпкерлік саласының күрета­мырына қан жүгірсе, елдің жағдайы жақ­сарады. Сондықтан мемлекет шағын және орта кәсіпкерлікті дамыту үшін ауқымды қолдаулар жасауда. Осынау игілікті аудан тұрғындары пайдаланса, әлеуетіміз артатыны анық.

Балтабай ОРДАБЕКОВ