Білім бәсекесінде бақ сынады

Бұрнағы күні ҚР Тәуелсіздігі күні мерекесіне орай  аудандық музейдің «Еңбек даңқы» залында «Тәуелсіздік тұтқасы жастарға аманат» атты интеллектуалдық сайыс өткізілді.

Шараға №35 И.Тоқтыбаев атындағы мектеп-лицейден «Зейін» тобы, №36 Ә.Тәжібаев атындағы мектеп-лицейден «Жігер» тобы, №131 Т.Қозыбаев атындағы мектептен «Болашақ барыстары» тобы және №210 О.Әбілпаттаев атындағы мектептен «Жас тұлпар» тобы қатысты.

Сайыстың мақсаты – оқушылардың ойлау қабілеттерін дамыту, сөйлеу мәдениетін, жан-жақты ой өрісін жетілдіру, ой ұшқырлығын арттыру, тәуелсіз Қазақстан мемлекетін өркендетуге, Тәуелсіздігіміздің шексіз, мәңгі болуына адал қызмет ететін білімді де жан-жақты дамыған, интеллекті жоғары, батыл текті, намысты ұрпақ, шынайы патриоттар тәрбиелеу болып табылады.

Білім сайысында оқушылар «Топ басшысының топты таныстыруы», «Бәйге», «Суреттер сыр шертеді» және «Мақал – сөздің мәйегі» кезеңдер бойынша бақ сынады. Барлық топтар білім кеңістіктерінің кең, деңгейлерінің жоғары екендігін дәлелдеп, жақсы ойын көрсете білді. Жеңімпаз топтарға "Диплом" мен бағалы сыйлық табысталды.