Ел бақыты – Тәуелсіздік

Тәуелсіздік – ең басты құндылығымыз. Тәуелсіздікке бейбіт түрде қол жеткізгеннен кейін еліміз әлемнің өркениетті мемлекеттерінің қатарына қосылды. 28 жыл ішінде Тәуелсіз елді қалыптастырып, нарықтың қиындығынан аман өткізген, сөйтіп Қазақстанды дүние дидарындағы ең мықты мемлекеттер мойындайтындай деңгейге жеткізген Тұңғыш Елбасының ерен еңбегі екендігін атап өтуге тиіспіз. Тәуелсіздік күні еліміздің барша азаматтары үшін орны ерекше мереке.

Ел Тәуелсіздігінің 28 жылдығына орай №210 О.Әбілпаттаев атындағы мектеп пен кент мәдениет үйінің қызметкерлері бірлесіп, «Ел бақыты – Тәуелсіздік» атты мерекелік кеш өткізді. Сахна шымылдығы әуез пәнінің мұғалімі Тимур Құсайнов жетекшілік ететін мектеп оқушыларынан құралған «Сырлы саз» оркестрінің орындауындағы «Тепеңкөк» күйімен түрілді. Мұнан соң мектеп оқушысы республикалық ән байқауының лауреаты Жаннұр Айтбай оркестрдің сүймелдеуімен «Ұлы Отан» әнін нақышына келтіре орындады. Келесі кезекте жас талапкер ақындар Жәния Аманбекова, Нұрай Қуанышбаева, Зейнеп Тойлыбайқызы, Мэлс Мақсат егемендік тақырыбына арналған жырларын тебірене оқыды.

Мерекелік концерттік бағ­дарлама барысында кіш­кентай мектеп оқу­шысы, республикалық байқаудың лауреаты Ернар Дүй­сенбай орындаған Дина Нұр­пейісованың «Нау­ыс­қы» күйі көп­шілік көңі­лінен шықты. Кеш барысында мектеп директоры Ә.Көшербаева бас­тап, кеш­­тің құрметті меймандары аудандық ардагерлер кеңесінің төра­ғасы Х.Әбенұлы, ардагер-ұстаз Б.Әбілпаттаев, аудандық газеттің жауапты хатшысы Ш.Нұр­сейітов және аудандық білім бөлімінің бас маманы Ж.Асық­баев сахнаға көтеріліп, ұстаз­дарға, ата-аналарға және оқушыларға Тәуелсіздік ту­ра­лы ыстық лебіздерін жеткізді. Әуез пәнінің мұғалімі Үміт Ерназар жетекшілік ететін оқушылар хоры орындаған «Тәуелсіздік – ел тірегі», «Қазақстаным» әндері көрермендерге ерекше көңіл-күй сыйлады.

Үлгі бізге аталардың ерлігі,

Ұлағаты, өнегесі еңбегі.

Тәуелсіздік туын ұстап жоғары,

Бүгінгі ұрпақ – болар елдің ертеңі, – дегендей ,мерекелік кеш соңында республикалық, халықаралық конкурстардың лауреаты Жомарт Наршаев «Көк тудың желбірегені» әнімен аяқтап, зал іші ду қол шапалаққа көмілді. Осылайша оқушылар ұлық мерекеде әсем ән шырқап, өздерінің туған елге деген сүйіспеншілігін жеткізді.