Партиялық кадрлық резерв құрамын жаңа мүшелер толықтырды

Кадрлық резерв жасақтау биыл бірінші рет пилоттық режимде Елбасы, «Nur Otan» партиясының төрағасы Н.Назарбаевтың «Сенім. Диалог. Болашаққа нық қадам – «Nur Otan» партиясының 7 серпіні» атты партияны жаңғырту бағдарламасы аясында партия жанына отаншыл, елге жанашыр азаматтарды топтастыру, яғни партияның ядролық электаратын қалыптастыру аясында қолға алынды.

Атап өту керек еліміздің барлық өңірлерінде қолға алынған бұл жоба Орталық партия аппаратымен бекітілген арнай жоспарға сәйкес Қызылорда облысында, Сырдария аудандық партия филиалында жүргізілді. Бірнеше кезең бойынша ұйымдастырылған жобаға өз жерлестерінің арасында сенім мен жоғары беделге ие азаматтар олардың қатарында педагогтар, дәрігерлер, кәсіпкерлер, журналистер, үкіметтік емес ұйымдардың мүшелері барлығы 47 азамат өтініш білдіріп, өз бағдарламаларын халық арасында кеңінен насихаттады. Өзара пікірталасқа түсіп, негізгі мақсат-міндеттерін де партияластарына жеткізді.

Бас аяғы 20 күнге созылған жұмыстарда өздерін жан-жақты көрсете білген үміткерлер партияластарының жоғары дауысына ие болды.

Анықтама үшін: дауыс беру ауданның 19 аумағында ашық форматта ұйымдастырылып, 4 мыңға жуық партияластары мен жасотандықтар өз таңдауын жасады. Яғни, үміткерлерге дауыс берушілердің үлес салмағы 99,8 пайызды құрады.