Білікті маман партия қатарын толықтырады

«Nur Otan» партиясы облыстық фили­алы пилоттық жоба аясында ауданда партиялық кадрлық резервті жасақтауға кірісті. Мұндағы мақсат – партияның белсенді мүшелерін топтастырып, кез келген мәселенің оң шешімін табуына атсалысу, халық пен партия арасындағы тығыз байланысты жандандыру, белсенділер қатарын арттыру. Осы бағыттағы пилоттық жоба тек ауданда ғана ұйымдастырылып отыр. Кадрлық резерв жасақтау жұмысы бары­сында «Nur Otan» партиясы орталық аппараты саяси жұмыс департаментінің директоры Е.Қарабалаев аудан жастарымен кездесті. Аудандық «Жастар» ресурстық орталығындағы кездесуде департамент директоры партияның кадрлық резервін жасақтаудағы мақсат-міндетті айтып өтті.

– Бұл – жалынды жастарға зор қолдау. Еліміздегі жетекші партияның кадрлық резервін жасақтау арқылы біз белсенділер қатарын арттырмақпыз. Сондай-ақ осы іріктеу нәтижесінде партияға лайықты емес мүшелерді қатардан шығаруды да жүзеге асырамыз. Сол кезде ашықтық пен жария­лықты қамтамасыз етіп келе жатқан партия жұмысы жанданатынына сеніміз мол, – деді Ерлан Жағыппарұлы.

Кездесуде «Nur Otan» партиясы аудандық филиал төрағасының бірінші орынбасары Е.Жақып сөз сөйлеп, кадрлық резервті жасақтау жұмысы қалай жүргізіліп жатқанын айтты. Бұл жан-жақты ақпараттандырып, қауырт желі іске қосылғанын атап өтті. Құжаттарды тапсыру реттілігін жеткізді.

Жиын барысында жастар партияның кадрлық резервіне қызығушылық танытып, құжаттар тапсыру талаптарын сұрап білді.

Е.БЕРКІНБАЕВ