Сенім үдесінен шығу маңызды

Жергілікті атқарушы билік тарапынан атқарылатын жұмыстардың барлығы тұрғындардың әлеуетін арттыруға бағытталуы тиіс. Осыған орай елді мекендердегі қордаланған мәселелерді шешу жолдарын кеңінен талқылап, алдағы уақытта жүргізілетін жұмыстарды саралау мақсатында аудан әкімі Р.Рүстемовтің төрағалығымен ауылдық округтерде көшпелі мәжіліс өтті.

Айдарлы ауылынан басталған мәжіліске аудандық мәслихат депутаттары, аудан әкімінің орынбасары, ауыл әкімі, мекеме, бөлім басшылары, ауылдық ардагерлер мен қоғамдық кеңес мүшелері және ауыл тұрғындары қатысты. Жиын­да аудан басшысы шалғай ауылдардың мәселесі назардан тыс қалмайтынын айтып, тұрғындардың пікірі жұмыс барысында ескерілетінін атап өтті.

– Көшпелі мәжілістің бас­ты мақсаты – тұрғындардың ұсы­ныс-пікірін тыңдау арқылы елді ме­­­кендегі өзекті мәселелерді ше­шу бо­лып табылады. Осыған орай жиын ашық әрі еркін форматта өтеді, – деп бастады аудан басшысы кіріспе сөзін. Мұ­нан кейін баяндамашыларға қағаз­бастылықтан арылып, тұрғындарға мемлекет тарапынан көрсетіліп жатқан көмекті түсінікті тілде жеткізу керектігін ескертті. Сонымен қатар ұсыныс айтушы тұрғындардың барлық сұрағына сала басшылары тарапынан жауап берілетінін жеткізді.

Мәжілісте жаппай кәсіпкерлікті дамыту мәселелері жөнінде аудандық кәсіпкерлік, өнеркәсіп және туризм бөлімінің басшысы Е.Ахетов баяндама жасады. Бөлім басшысы соңғы жылдары кәсіпкерлік саласын дамытуға айрықша басымдық беріліп жатқанын айтып, жиынға қатысушы ауыл тұрғындарына мемлекеттік бағдарламалардың тиімді тұстарын түсіндірді.

– Кәсіпкерлікпен айналысуға ниетті азамат­тарға қазір барлық жағдай жасалған. Тегін кеңес беріліп, бизнес жобаларын сүйемелдеу жұмыстары да жүргізілуде. Сондай-ақ мемле­кет­тік бағдарламалар мен қайтарымсыз грант­­­тар бар. Мәселен, 2017-2021 жылдарға ар­налған «Еңбек» нәтижелі жұмыспен қам­ту және жаппай кәсіпкерлікті дамыту бағдар­ламасы көп кәсіпкердің өз кәсібін ашуына негіз болды. Бағдарлама бойынша 6 процентпен 18,0 млн теңгеге дейін 5 жылға нес­ие беріледі. Сонымен қатар «Стартап» жаңа бизнес идеяларды іске асыру үшін 100-200 айлық есептік көрсеткіш көлемінде мемлекеттік гранттар тағайындалуда, – деген бөлім басшысы Айдарлы елді мекені бойынша 5 азамат «Бизнес бастау» курсын оқығанын және 3 тұрғын «Бизнес кеңесші» сертификатын иеленгенін жеткізді. Ауыл халқына алдағы уақытта мал шаруашылығын дамыту бағытында жобалар дайындап, мемлекет тарапынан қолдау алуға болатыны айтылды.

Мұнан кейін аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы А.Мұхан 2020 жылдың 1 қаңтарынан бастап көп балалы отбасыларына берілетін мемлекеттік жәрдемақы мен атаулы әлеуметтік көмек туралы хабарлама жасады. Айта кету керек, келесі жылдан бас­тап жаңа мемлекеттік жәрдемақы отбасылық кіріске қарамастан барлық көп балалы, яғни төрт немесе одан да көп кәмелет жасына толмаған және орта арнаулы, жоғарғы оқу орнында оқитын жасы 23-ке толмаған баласы бар отбасыларға беріледі. Мемлекеттік жәрдемақы төлемінің мөлшері отбасы табысына емес, бала санына байланысты болады. Кедейлік шегі өңірлік ең төменгі күнгөріс деңгейінің 70 проценті мөлшерінде есептеледі. Басты шарт еңбекке қабілетті отбасы мүшелері жұмыс істеуі қажет. Отбасының еңбекке қабілетті мүшесі ұсынылған жұмыстан бас тартатын болса, АӘК тағайындалмайды. Сондай-ақ аз қамтамасыз етілген отбасылар үшін кепілдендірілген пакет енгізіледі. Бұл арқылы мектеп жасына дейінгі балаға тамақ, гигиеналық құралдар берілсе, мектеп жасындағы бала мектепте ыстық тамақпен, құрал-жабдықтармен, киім-кешекпен қамтамасыз етілетін болады.

Мәжіліс барысында 2020 жылдың 1 қаң­тарынан бастап қолданысқа енгізілетін міндетті әлеуметтік медициналық сақтандыру жүйесі жөнінде аудандық аурухананың маман­дан­дырылған бөлімінің меңгерушісі С.Ерімбет баян­дады. Бөлім меңгерушісінің айтуынша, ке­лесі жылдан бастап Заң жобасына сәйкес азаматтарға медициналық қызметтің екі түрі ұсынылады. Біріншісі, республикалық бюджеттен қаржыландырылатын медициналық көмектің кепілдендірілген көлемі көрсетілетін базалық пакет. Бұл ҚР барлық азаматына қолжетімді болады. Аталған пакет бойынша жедел көмек, санитарлық авиация, профилактикалық екпелер, әлеуметтік маңызы бар аурулар мен шұғыл жағдайлардағы меди­циналық көмек көрсетіледі. Екіншісі, меди­циналық сақтандыру қоры арқылы көрсетілетін сақтандыру пакеті. Бұған амбулаториялық-емханалық, стацио­нар­лық және стацио­нардың орнын баса­тын көмек, қалпына келтіру емі, ме­дициналық оңалту, полиа­тивті және мейіргерлік күтім, жоғары технологиялық кө­мек кіреді. Міндетті ме­ди­­циналық сақтандыру қо­ры­на төленетін жарнадан азамат­тардың 15­ са­на­­ты босатылады. Олар балалар, «Алтын­ ал­­қа», «Күміс алқа», «Ба­тыр ана», І және ІІ дәре­желі «Ана даңқы» орде­­нінің ие­­гер­лері, ҰОС арда­гер­лері мен мүгедектері, мүм­кіндігі шек­теу­лі азаматтар, жұмыссыз ретін­де тір­келгендер, ин­тер­нат­та оқи­тын және тәр­биеле­не­тіндер, күн­діз­гі бө­лімде оқи­тын студент­тер, бала тууына не­месе асырап алуына жә­не 3 жасқа дейінгі бала кү­­ті­міне байланысты демалыс­та отыр­ғандар, жұ­мыс істе­мейтін жүкті әйел­­дер, зейнеткерлер, әскери қызметкерлер, арнайы мемлекеттік және құқық қорғау органы қызметкерлері, сот үкімімен жазасын өтеушілер, уақытша ұстау және тергеу изоляторындағы азаматтар. Атап өту керек, жұмыс берушілер жалданған жұмысшылар үшін жарна төлейтін болса, салық органына тіркелген немесе өзін-өзі жұмыспен қамтитын азаматтардың өздері жарна төлейді.

Ауыл тұрғындары үшін көптеген маңызды мәлімет айтылған мәжілісте тұрғындар өздерін толғандырған тақырыптар бойынша сала мамандарына сауалдарын жолдап, жауап алды. Аудан басшысы мекеме басшыларына әрбір тұрғынның сұрағы мен көтерген мәселесін мұқият тыңдап, шешу жолдарын қарастырып, нақты жауап беруді тапсырды.

Күн тәртібінде үш мәселе талқыланған және ауыл тұрғындарының ұсыныс-пікірі тыңдалған көшпелі мәжіліс Жетікөл, Аманкелді, Бесарық, Қоғалыкөл, Шіркейлі, Н.Ілиясов, Ақжарма, Іңкәрдария, Шаған ауылында өтті. Мәжілісте жаппай кәсіпкерлікті дамыту, 2020 жылдың 1 қаңтарынан бастап енгізілетін атаулы әлеуметтік көмек пен міндетті медициналық сақтандыру жүйесі жөнінде ауыл тұрғындарына түсіндірме жұмыстары жүргізілді. Сондай-ақ ауылдың өзекті мәселелерін шешу жолдары қарастырылды. Көшпелі мәжілісті қорытындылаған аудан әкімі Р.Рүстемов тиісті хаттамалық тапсырма түзілетінін, арнайы іс-шара жоспары қабылданып, нақты жұмыстар жүргізілетінін атап өтті.

А.ИБРАГИМҰЛЫ