Тіршілік тынысы Tirshilik-tynysy.kz ақпараттық агенттігі
» » Күрішшілерге лайықты құрмет

Күрішшілерге лайықты құрмет

Шіркейлі ауылындағы «Мәді қажы» серіктестігінің күрішшісі Жәні­бек Ыбыраев 32 гектардан 108 центнер өнім алыпты дегенді естігенде таңғалғанымыз рас. Бұл қажырлы еңбектің, маңдай тер мен ізденістің жемісі еді. Іргелі серіктестікте адал еңбектің қазанында қайнап, ел қамбасын алтын дәнге толтыруға талаптанған, тынбай еңбек еткен өзге де озаттар көп екен. Ортақ абырой үшін аянбаған озаттар үшін Кеңес Ода­ғының Батыры Жаппасбай Нұр­сейіт­ов атындағы алаңда арнайы салта­натты шара ұйымдастырылып, біз де шіркейлілік егіншілердің ерекше күткен қуанышына ортақтастық.
Салтанатты шара Қалтай Мұха­мед­жанов атындағы ауылдық мә­­­де­ниет үйінің өнерпаздары ұйым­дастырған прологпен бас­талды. Мұ­нан кейін ақ жаулықты әжелер егін даласындағы еселі еңбек пен мамыражай тіршілік жөнінде сыр шертетін әсем әндерді әуелете шыр­қады. Салтанатты шарада аудан әкі­мі Р.Рүстемов сөз сөйлеп, ауыл тұрғындары мен серіктестік ұжымын егін жинау науқанының жемісті қо­ры­тындылануымен құттықтады.
– Қасиетті Сыр топырағы биыл да жемісті өнім берді. Рекордтық же­тістікті бағындырып, диқандардың ет­кен еңбегі мен төккен терінің өтеуі қайтты. Адал еңбектің жарқын үл­гісін көрсетіп, аудан абыройын асырған дала еңбеккерлерінің қа­та­­­­рында Шіркейлі ауылындағы «Мәді қажы» серіктестігінің күрішшілері де бар. Серіктестік биыл 2200 гектар жерден 60 центнер өнім жинап, егін жинау науқанын зор жетістікпен қорытындылап отыр. Бұл ауылдың ғана жетістігі емес, ауданымыздың, облысымыздың мерейі. Өйткені, Тәуелсіздікке қол жет­кіз­ген ал­ғашқы жылдан бастап ауыл­шар­уа­шылығы саласын дамытуға мемлекет тара­пынан зор қолдаулар көрсетілді. Арнайы мемлекеттік бағдарламалар қа­был­данып, егін егіп, өнім өндіріп, жұмыс жасаймын деген азаматтарға нақты көмектер берілді. Міне, бүгінде мемлекет тарапынан көрсетілген қолдаулар ауылдардың әлеуметтік-эко­номикалық дамуына жол ашып, тұрғындар әлеуетінің артуына септігін тигізуде. Жа­қында облыс орталығында өткен «Алтын дән – 2019» салтанатты шарасында бірқатар сырдариялық күрішші марапатталды. Оның ішінде «Мәді қажы» серіктестігінің де мамандары бар. Дала диқандарының еңбегіне құрмет көрсетуді мақсат еткен бұл үрдіс ауданымызда да жалғасын тауып, мерейлі мереке аталып өтілді. Ал бүгін думанды шара Шіркейлі ауылында ұйымдастырылуда. Бұл бірлігі бекем, тірлігі тындырымды ауданымызда молшылық мерекесінің мәнін аша тү­­суде. Сондықтан баршаңызды егін жинау науқанының қорытындылануымен шын жүректен құттықтаймын, – деген аудан басшысы алдағы жылы да шіркей­ліліктердің үздіктер көшін бастайтынына сенім білдірді.
Салтанатты шарада «Мәді қажы» се­рік­тестігінің төрағасы, аудандық мәс­лихат депутаты Сейткамал Сұлтанов аудан бас­шысының егін жинау науқаны басталар тұста ауылға арнайы келіп, егіншілерге сәт­тілік тілегенін айтып, сол кезде ауыл ақсақалдары берген ақ бата мен айтылған ақ тілектер қабыл болып, серіктестік жылды жемісті қорытындылап отырғанын жеткізді. Серіктестіктің әрбір маманына сыйақы қа­растырылғанын атап, өндірістік бригада басшысы Әбделнасыр Мырзағалиевке су жаңа «Нива» авто­көлігінің кілтін табыс етті. Сонымен бір­ге, жүктелген міндеттерін абыроймен ат­қарған үздік мамандарға «Алғыс хат» және сыйлыққа түрлі түсті теледидарлар мен газ плиталары берілді.
Думанды шара серіктестіктің қолдауы­мен Шіркейлі ауылына арнайы келген об­лыстық филормония өнерпаздарының кон­церттік бағдарламасына ұласты. Осы­­­­лай­­ша, атақты «Еңбек Қызыл Ту» ор­денді ауылдағы іргелі серіктестік егін­шілерге ерекше құрмет көрсетіп, ауыл еңбеккерлерін бір серпілтіп тастады.

А.ҚҰРМАНАЕВ
26 қазан 2019 ж. 685 0