Тіршілік тынысы Tirshilik-tynysy.kz ақпараттық агенттігі
» » Жеңіс туын желбіреткен

Жеңіс туын желбіреткен

Халқымызда «Іздеушісі бардың ізі өшпейді» деген тәмсіл бар. Сол секілді көнекөз қариялар «Адам ұрпа­ғымен мың жасайды» дейді. Айтса айтқандай, іздеуші ұрпақтарының арқасында бүгін сырдариялық майдангер Күзентай Ше­рімовтің рухы қай­та жаңғырмақ.
«Атамыз туралы мақала жария­ламақ ниетте едік. Аудандық газет ақпараттық қолдау көрсетеді ме екен?!» деп әлеуметтік желідегі жеке па­рақ­шамызға хат келді. Хатты жолдаушы Асқар Күзентаев есімді азамат өзінің Сырдария ауданының тумасы екенін айта келе, атасының Ұлы Отан соғысына қатысқанын баяндапты. Айтуынша, майдангер атасы Күзентай Шерімов елге жеңіспен оралғаннан кейін ішкі істер саласында жемісті еңбек етіпті. Әлеуметтік желі арқылы жолданған аталған хабарламаны оқы­ғаннан кейін жауап жаздық. Ойлы оқырман – басылым тірегі екенін айтып, газеттің алдағы нөміріне мақала дайындалатынын жеткіздік. Сөйтіп, із­де­ністі серік етіп, осы мақаланы жа­зуға кірістік.
Майдангердің немересі бізге қыс­қаша өмірбаян мен сурет жолдапты. Сосын атасын тануы мүмкін деген азаматтардың аты-жөнін жазып жіберіпті. Олардың қатарында ау­дан­дық ардагерлер кеңесінің төр­ағасы Хайролла Әбенұлы бар екен. Ардагер атамызбен хабарласқа­ны­мызда майдангердің елге жеңіспен орал­ғанын, өнегелі ұл-қыз тәрбиелеп, ішкі істер саласында еңбек еткенін айтты.  Күзентай Шерімов жөнінде Рақымжан Байменовтің жақсы білетінін жеткізді.
...Әрине шағын өмірбаянға қарап бір-­екі беттік очерк жаза салуға бола­тын да шығар. Бірақ жас кезде іздене­йік, зерттеп көрейік деп Рақымжан қажы Бәйменовке де хабарластық. Қа­рия біздің қаламымызға арқау болған кейіпкеріміз жөнінде есте қалған есте­ліктерімен бөлісті.
– Ұлы Отан соғысының зардабы жа­нын жараламаған адам жер бетінде жоқ шығар. «Соғыс» деген сөзді жек көретін ұрпақтың бірі менмін, – деп бастады ардагер әңгімесін. Мұнан соң қызмет барысында көп майдангермен бірге жұмыс істегенін, араласқанын айтты. Ауданда көзі тірі екі-ақ ардагер қалғанына назар аударды. – Арада қаншама жыл өтсе де Ұлы Отан соғысының ардагерлерінің есімі, ерлігі ұмытылмайды. Күзентай Шерімов сон­­дай ерлердің бірі болатын, – деді Ра­қымжан Бәйменов.
– Біз Күзентайдың отбасымен Те­рең­өзек кентінің қазіргі Аманкелді Има­нов көшесінде көрші тұрдық. Жақ­­сы, ақ көңілді азамат еді. Ма­йор шенін алғаны есімде. Көрші болған соң араластық. Ол кездерде көрші деген бауырыңдай жақын, сырлас, жанашыр еді. Балаларымыз бірге ойнап, бірге өсті. Ішкі істер саласында қызмет атқаратын азаматпен кейде аудан туралы пікірлесетінбіз. Өз жұмысына адал азамат болатын. Қазір арада көп жыл өтті. Түрі еміс-еміс есіме түседі, – дейді ардагер атамыз.
Енді өмірбаянда көрсетілген дерек­терді оқырман назарына ұсынайық. Күзентай Пірәліұлы Шерімов 1922 жылы дүниеге келген екен. Ол май­данға 1942 жылы шақырылыпты. Сұ­рапыл соғысқа 181-ші гвардиялық-артериялық минометшілер полкінің құрамында дәлдеуші ретінде аттаныпты. Жау әскерін талқандау жолында аянбаған кіші сержант Берлин қаласына дейін жеткен. 1944 жылдың қазан айында өкпе тұсынан ауыр жа­рақат алып, госпитальға түскен.
Күзентай Пірәліұлы соғыстағы жа­уын­герлік ерлігі үшін көптеген ал­ғыс хатпен, медаль, ордендермен ма­ра­­патталған. Майдангер әсіре­се Таганрог, Жаңа Буг, Одесса, Минск, Брест, Дебрецен, Хатван қалаларын­дағы шайқастарда ержүрек жауынгер ретінде танылыпты. Соған сәйкес Кеңестер Одағының Жоғарғы Бас қолбасшысының бұйрығымен бірнеше рет марапатталған. Мұнан бөлек Ұлы Отан соғысының II дәрежелі ор­денімен, «Кеңес әскері және флотына ХХХ жыл» медальдарымен наград­талған.
Соғыс аяқталған жылдардан ке­йін де Күзентай атамыз өзінің саналы ғұмырын құқық қорғау саласына арнаған. Ол темірдей тәртіпті қажет ететін ішкі істер саласында жемісті еңбек еткен. Қызылорда облысының Сырдария, Шиелі, Жа­ла­ғаш, Қазалы аудандарында және Төретам кентінде жұмыс істе­ген. Же­ңіс сарбазы майор шенін алған. Тәртіп пен талап, тазалық пен тиянақтылықты жұмысына арқау еткен ол әріптестерінің арасында зор беделге ие болған. Бұл туралы Ұлы Отан соғысының ардагері Маханбет Бержанов айтты.
– Біз үшін соғыс ең ауыр, ең қор­­қынышты сөз. Өйткені біз бұл қыр­ғынды көзімізбен көрдік, басымыздан өткердік. Қазіргі жастарға бәрі ертегі, бәрі бір сәтте бола салған­дай көрінеді. Бірақ әсте олай емес. Соғыс біздің жанымызды жа­ралады, жақынымыздан айырды. Қан­шама ерлер қаза болды. Елге оралғаны тылдағы тауқыметті тірші­лікке араласып, еңбек етті. Сондай майдан­герлердің бірі Күзентай еді. Ол менің есімде. Ол да мен секілді ішкі істер саласында жұмыс істеді. Тиянақты болатын. От пен оқтың ортасынан келген оның ақкөңілділігі кімді де болса таңғалдыратын. Ішкі істер саласының дамуына қосқан үлесі және мінсіз қызметі үшін Күзентай Шерімов «КСРО Қарулы күштеріне 50 жыл», «Мін­сіз қызметі үшін» КСРО Ішкі істері министрлігінің II дәрежелі медалімен марапатталғаны есімде, – дейді майдангер.
Иә, ер есімі – ел есінде. Майдан­­герлердің ерлігі ешқашан ұмытыл­майды. Жас буын олардың ерлігін өмірлік өнеге санайды. Ал Күзентай Шерімовтің ұрпақтары соғыс арда­герінің ұрпағы болғандарын мақтан тұтады және сол атқа кір келтірмей, Отанға адал қызмет етуді мақсат еткен.
– Жыл сайын Жеңіс күнін асыға кү­теміз. Бұл күн біздің отбасы үшін ерекше мереке. Атамыздың рухына Құран бағыштап, еске аламыз. Тағ­зым ала­ңына барамыз. Жеңіс туын желбіреткен майдангердің ұр­пағы болғанымызды мақтан тұтамыз. Күзентай атамызбен Несібелі әжеміз­ден Қалдыгүл, Сәкен, Молдабек атты балаларының ұрпақтары бүгінде егемен еліміздің Нұр-Сұлтан, Қарағанды, Жезқазған және Қызылорда қала­рында еңбек етуде. Олар мемлекеттік қызмет, білім беру, экономика, спорт, темір жол, кен орындары секілді сан салада қызмет атқаруда, – дейді батырдың немересі Серік Сәкенұлы.
Біз бүгінгі мақаламызда сырдария­лық майдангер Күзентай Шерімов туралы жаздық. Ардагер есімін жаңғыртқан ұрпақтарының ізденісі бізді сүйсінтті. Шіркін, әр ұрпақ осылай өз аталарын мақтан тұтып, ерлік шежіресін жаңғыртар болса, Ұлы Жеңістің қадір-қасиеті артып, жастардың Отанға деген сүйіспеншілігі оянар еді. Бұл ретте өмірі өнегеге толы майдангердің ұрпақтары өз замандастарына үлгі көрсетті деп нық айта аламыз.

Ақтөре ИБРАГИМҰЛЫ

25 сәуір 2020 ж. 1 049 0