Халықаралық турнир жалауын көтерді

Мемлекет және қоғам қайраткері Елеу Көшербаевты еске алуға арналған волейболдан ХХIV халықаралық турнир өз жалауын көтерді. Турнирдің ашылу салтанатына аудан әкімі Берік Сәрменбаев, аудандық мәслихат төрағасы Ержан Әжікенов, облыстық мәдениет және спорт басқармасы басшысының орынбасары Жігер Айекешов және қайраткер-тұлғаның ұрпақтары мен аудан жұртшылығы, спорт саласының ардагерлері қатысты.

Спорттық іс-шарада аудан әкімі Б.Сәрменбаев турнирге қатысушыларға сәт­тілік тіледі.

– Елеу Көшербайұлы – қазақ елінің экономикасын, мәдениетін өркендетуге, ұлттық дәстүрді сақтауға, әсіресе Қызылорда облысының дамуына өзінің қажымас қызметі арқылы айрықша үлес қосқан қайраткер. Ардақты азамат әдебиет пен өнер саласының дамуына да өзіндік қолтаңбасын қалдырған біртуар тұлға. Елеу Көшербайұлы 1960-1970 жылдары Қазалы, Сырдария аудандық партия комитетінің екінші хатшысы, Тереңөзек, Сыр­дария ауданының атқару коми­тетінің төрағасы, облыстық атқару комитеті төрағасының орынбасары қызметтерін атқарған. Сонымен қатар, 1975-1991 жылдары Қармақшы, Қазалы аудандық партия комитетінің бірінші хатшысы болып абыройлы еңбек еткен. Ел мүддесін бәрінен биік қойып, елеулі қызметтер атқар­ған азаматты халықтың ықыласына бөленген тұлға деп айтуға толық негіз бар. Бұл сөзі­мізге қайраткердің «Ленин», «Октябрь революциясы», үш мәрте «Еңбек Қызыл Ту» орден­імен және бірнеше медальдармен мара­пат­талғаны дәлел. Турнирдің ха­лық­аралық дәрежеде және дәс­­түрлі түрде ұйым­дастырылуы өте дұрыс, – деді Берік Әбдіғаппарұлы.

Өз кезегінде облыстық мәдениет және спорт басқармасы басшысының орынбасары Жігер Айекешов қайраткердің зейнеткерлікке шыққаннан кейін де қоғамдық істерге араласып, облыстық ардагерлер кеңесінің төрағасы қызметінде мерейі үстем болғанын, еліміздің тарихы үшін маңызды жобаларды жүзеге асыруға белсене атсалысып, халықтың алғысына ие болғанын айтты.

– Мемлекет және қоғам қайраткері Е.Көшербаевтың елдің есінде қалған еңбектері жетерлік. Мәселен, ардақты тұлғаның бас­тамасымен және ерекше ықпал етуімен Қорқыт ата мемориалды кешені тұрғызылды. Бұл жер бүгінде Түркі тілдес елдердің ортақ тағзым ететін орнына айналды. Сондай-ақ, Орталық Азия мен Қазақстан жастар қозғалысын ұйымдастырушылардың бірі – Ғани Мұратбаев ескерткішінің ашылып, мұражайының салынуы­на атсалысты. Ардақты әкенің ісін ұрпақтары лайықты жалғастыруда. Атап айтқанда, Елеу Көшербайұлы бастаған Қорқыт ата мұрасы ұрпақтарының мұрындық болуымен ЮНЕСКО-ның мәдени мұраларының қатарына қосылды. Одан бөлек, қайраткер тұлғаның өмірі мен қызметін насихаттау мақсатында ұрпақтары бір ғана Сырдария ауданында емес, мәдени-спорттық іс-шараларды облыс көлемінде жыл сайын ұйымдастырып келеді. Бұл – әкені ардақтап, есімін мәңгі етудегі игі іс. Сондықтан Елеу Көшербайұлының елге жасаған еңбегі жас ұрпаққа үлгі-өнеге. Сыр елінің дара тұлғасының есімін дәріптеу мақсатындағы турнирге қатысушылардың санының жыл са­йын артуы да турнирдің мәртебесін биіктетуде. Халықаралық турнир спортшылар үшін саламатты өмір салтын қалыптастырудың, жаңа достар табудың және жеңіске бас­тар жолдың нағыз үлгісі ретінде өз тұғырын биіктетті, – деді Жігер Оңдасынұлы.

Турнирдің ашылуында мемлекет және қоғам қайраткері Қырымбек Көшербаевтың, ҚР Парламенті Мәжілісінің депутаты Мұрат Ергешбаевтың құт­тық­тау жеделхаты оқылды. Өз кезегінде Өзбек­стан волейбол Феде­ра­циясының аға жат­тық­тырушысы Шерузат Маталиев Көшербаевтар әулетіне арнайы сыйлық табыс етті.

Айта кетейік, турнирге Өзбекстан мем­лекетінен және еліміздің облыстарынан 30-ға жуық ко­манда, 350-ден астам спортшы қатысуда. 24 қыр­­күйекте қорытындыланатын турнир жеңім­паз­дары қаржылай және бағалы сыйлық­тармен мара­патталатын болады.

Ақтөре ИБРАГИМҰЛЫ