Дәстүрлі доданың жалауы желбіреді

Есімі елге белгілі мемлекет және қоғам қайраткері Елеу Көшербаевты еске алу­­ға арналған дәстүр­лі до­­даның жалауы желбі­ре­ді. Волейболдан 23 рет өт­кі­зіліп отырған халық­аралық турнирдің ашылу сал­­­та­натына аудан әкімі Мұрат Ергешбаев, халық­аралық жек­пе-жек конфедерация­сы­ның президенті Усман Дигаев, қайраткер тұл­­­ға­ның ұр­пақтары қа­тыс­­ты.

Халықаралық іс-шараның ашылуында ең алдымен мемлекет және қоғам қайраткері Қырымбек Көшербаевтың құт­тықтау хаты оқылды. Құттық­тауда мем­лекет және қоғам қайраткері Елеу Көшербаевтың өз замандастарымен бірге ту­ған елдің жасарып-жаңа­руына ерекше үлесін қосқаны аталған. Сонымен қатар ардақты әке бастап кеткен сара жолмен жүру балалары үшін үлкен бақыт екені және бүгінгідей жарыстар өскелең ұрпақтың бойында достық, сыйластық, ауызбіршілік сияқты қасиеттерді біріктіре­тінін айтылып, қатысушыларға сәттілік тілеген.

Салтанатты іс-шарада сөз алған аудан басшысы мемлекет және қоғам қай­раткерінің ел үшін атқарған елеулі қыз­метіне тоқталып, дара тұлғаның кейінгі толқынға қалдырған өнегесі мол екенін атады.

– Елеу Көшербаев – қазақ елінің эко­номикасын нығайтып, мәдениетін өр­кендетуге, ұлттық дәстүрді қорғап сақ­тауға, әсіресе Қызылорда облысының жан-жақты дамуына өзінің қажымас қыз­меті арқылы айрықша үлес қосқан қайраткер. Оның елдің есінде қалған ең­бектері жетерлік. Мәселен, «Қорқыт ата мұрасы» көпұлттық номинациясы­ қолдау тауып, ЮНЕСКО-ның 13-сессия­сында бүкіл әлемге танылды. Елеу Көшербаевтың бастамасымен, ерекше ықпал етуімен Қорқыт ата мемориал­ды кешені тұрғызылды. Халық батыры Жанқожа Нұрмұхаммедұлының рухын көтеру үшін республикалық дәрежеде тойлауды ұйымдастырды, ескерткіш орнатты. Шығыс жұлдызы Ғани Мұратбаев ескерткіші ашылып, мұражайы салынды. Тұрмағамбет ақын кесенесінің бой көтеруіне де атсалысты. Міне, қай­раткердің халқына жасаған осындай игі істерін ұмыт қалдырмау мақсатында ұрпақтары бір ғана Сырдария ауданында емес, мәдени-спорттық шараларды түр­лі аудандарда ұйымдастырып, әкеге құрмет көрсетіп, есімін мәңгі етуде. Жыл сайын дәстүрге айналған волей­болдан халықаралық турнир де биыл жалғасын табуда. Мемлекет және қоғам қайраткері, Сыр елінің дара тұлғасының есімін дәріптеу мақсатындағы турнирге қа­тысушыларға сәттілік тілеймін, – деді аудан әкімі Мұрат Нәлхожаұлы.

Халықаралық турнирге көршілес Шешенстан Республикасы, Грозный қала­сынан, еліміздің барлық облысынан және аймақ аудандарынан 22 команда бойынша 250-ден аса спортшы қатысып, бақ сы­науда. Төрт күнге жоспарланған жарыс аудан орталығындағы дене шынықтыру-сауықтыру кешенінде өтіп жатыр.
Айта кетейік, сырдариялық волейболшылар осы күні Грозный командасымен кездесіп, жарысты жеңіспен бастады.

Ердос БЕРКІНБАЕВ