Ақсүйектер ойыны
Ел тәуелсіздігінің 30 жылдығы құрметіне аудандық ардагерлер кеңесі мен «Халықаралық «Қазақ тілі» қоғамдық бірлестігі Сырдария аудандық филиалының ұйымдастыруымен ардагерлер арасында «Тәуелсіздік – тұғырым, туған тілім – қыдырым» атты бильярдтан турнир өткізілді.Біріншілікті өткізудегі мақсат – тәуелсіздіктің маңызын және қазақ тілінің мәртебесін насихаттау. Турнирді халықаралық «Қазақ тілі» қоғамдық бірлестігі Сырдария аудандық филиалының төрағасы Ш.Нұрсейітов ашып, ауданымыздың серпінді дамуы тәуелсіздігіміздің жемісі екендігін атап өтті.
– Соңғы кезде ауданда тіл жанашырларының қатары көбейе түсуде. Аудандық білім, денсаулық, мәдениет, спорт және орман шаруашылығы мекемелерінде бастауыш ұйым жұмыстары жандануда. Кент әкімдігі өзі бас болып және бірқатар балабақшалар жанынан жаңадан бастауыш ұйымдар құрылды. Тіл мәртебесінің артуына ардагерлер де үлгі көрсетіп, бүгінгі турнирді ұйымдастырып отыр, – деді төраға.
Бильярд бәсекесі екі күнге созылды. Жақсы ойын өрнегін көрсеткен Амантай Есмағамбетов бірінші орынды жеңіп алды. Екінші орынды Мектепхан Елеусінов иеленсе, Тойым Айкөпешов үшінші орынға табан тіреді. Жарыс қорытындысында жеңімпаздар мен сайысқа қатысушылар аудандық ардагерлер кеңесі мен халықаралық «Қазақ тілі» қоғамдық бірлестігі Сырдария аудандық филиалының дипломы және «Алғыс хатымен» марапатталды.
Бибісара ЖАНӘЛІ
