Батыр атындағы турнир
ІІ дәрежелі «Айбын» орденінің иегері, полиция аға лейтенанты Талғат Қозыбаевты еске алуға арналған бокстан мектепішілік турнир өтті. Спорт бәсекесіне боксқа құмар оқушылар қатысты.Турнирдің ашылу салтанатында өшпес ерлік көрсетіп, қызмет батында бақилық болған Талғат Қозыбаевтың әкесі Есентай Қозыбаев, №131 орта мектептің қамқоршылық кеңесінің төрағасы Зайдағали Жүсіпбаев, спорт ардагері Жарбол Зкиряев сөз сөйлеп, батыр ұл туралы естеліктер айтты. Кейін жас спортшылар батырдың ескерткіш бюстіне тағзым етіп, гүл шоқтарын қойды.
Бокс бәсекесінде жас спортшылар төрт салмақ дәрежесінде қолғап түйістіріп, қызу ойын өрнегін көрсетті. Атап айтқанда, 20 келі салмақ дәрежесінде жүлделі бірінші орынды Ғ.Зайдағали иеленсе, екінші орын Н.Жомартбековке бұйырды. Ал 22 келі салмақ бойынша бірінші орын Б.Сәбитұлы, екінші орын Д.Жұмабеков, үшінші орын Н.Пернебаевқа бұйырды. 24 келі салмақта бірінші орынды Р.Смайлов, екінші орынды Қ.Ибраимов, 28 келіде бірінші орынды Б.Сәбитұлы, екінші орынды А.Рамазанов, үшінші орынды Ж.Маратұлы иеленді. Жеңімпаздар Алғыс хатпен марапатталды.
Майя ҚОЖАБАЙ
