Елбасы Жолдауы халықтың әрдайым асыға күтетін маңызды құжат. Жақсылықтың жаршысындай болған биылғы Жолдау 10 қаңтар күні жарияланды. Жолдау атауы: «Төртінші өнеркәсіптік революция жағдайындағы дамудың жаңа мүмкіндіктері».
Адамзат жаңа дәуірге – өнеркәсіптік революцияға қадам басып отыр. Қоғамға аса жылдамдықпен еніп жатқан жаңа технологиялар әлемді өзгертуде. Бұл еліміздің дамыған 30 елдің қатарына кіруге берілген мүмкіндік. Жолдауда 10 негізгі міндет атап көрсетілді. Адами капиталды ілгерілету үшін білімді дамыту қажеттігіне тоқталды. Сондай-ақ, денсаулық саласындағы сапалы қызмет түрлі аурулардың алдын алады,- деді.
Ел болашағы-жастар. Жастарға сенім артып, оларды оқытып, ғылымға тартып, қолдау көрсетуге баса назар аударылған. Өзінің жалғасын тапқан баршаға тегін кәсіптік-техникалық білім беру жобасы арқылы, әсіресе, ауыл азаматтары ауылшаруашылық саласын меңгеретін болады. Бұрындары әрбір шаруашылық өзіне қажетті маманды өздері оқытса, енді мемлекет тарапынан қолдау бар, кәсіптік білім тегін беріледі.
Елбасы айтқан барлық маңызды жоспар бүгінгі даму процесіне тікелей қатысты. Онда тұтас ел тағдыры тұрғандай. Жолдауда ауыл шаруашылығын жандандыруда ақылды технологияларды пайдалану қажеттігі айтылды. Қазір егін даласындағы жаңа технологиялар техникалық және кәсіптік білім беру бағдарламаларын жаңартуды қажет етеді.
Жолдау сапалы бастамаларға әкелетін тапсырмалар мен міндеттерге толы. Жалпы жаңа Жолдау Елбасының «Болашаққа бағдар: рухани жаңғыру» бағдарламалық құжатымен тығыз байланысады. Жолдау әрбір қазақстандықты жігерлендіріп, болашаққа жауапкершілік жүктейді.