Оқиға орнына жеткен төтеншеліктер заматында жедел штаб құрып, өрттің шығу себебін анықтауға кірісіп кеткен болатын. Аудан әкімі аппаратының жұмылдыру дайындығы және аумақтық қор­ғаныс бөлімі, Сырдария орман және жан­уарлар дүниесін қорғау жөніндегі мемлекеттік мекемесі, аудандық төтенше жағдайлар бөлімі, №12 өрт сөндіру бөлімі бірлескен оқу-жаттығуға 50-ге жуық сала мамандары жұмылдырылды.

Ең алдымен, төтеншеліктер дала өртінің шығуына себепкер болған олқылықтарды анықтады. 5-10 минут ішінде қызыл жалынмен арпалысқан сала мамандарына тәжірибелік тұрғыдан бағыт-бағдар берілді. Ауданға қа­расты елді мекендерден еріктілер тартылып, дала өртін тоқтатуда кәсіби мамандарға кө­мектесті. Орман қорына жататын жерлерде өрттің жиі шығуына тосқауыл қою үшін арнайы жоспар құрылды.

– Аудан аумағында өрт оқиғасына тос­қауыл қою мақсатында атқарушы билік тарапынан жоспарға сәйкес жұмыстар жүр­гізіледі. Күн тәртібінен түспейтін төтенше жағ­дайлардың алдын алу бойынша тиісті іс-шаралар атқарылатын болады. Оның ішінде, өртке қатысты тиісті бөлімдердің жұмысын жандандыру үшін жан-жақты қолдау көрсетіледі, – деді аудан әкімі аппаратының жұмылдыру дайындығы және аумақтық қорғаныс бөлімінің басшысы Қ.Қуандықов.

Өз кезегінде Сырдария орман және жануарлар дүниесін қорғау жөніндегі мемлекеттік ме­кемесі директорының орынбасары Б.Ұлтанбекұлы, аудандық төтенше жағдайлар бөлімінің бас маманы Р.Беркінбаев оқу-жаттығу барысында дала өртін сөндіруге бірнеше техника қамтылғанын және тоғайда орын алған өртті дер кезінде ауыздықтауға байланысты атқарылған жұмыстарды баяндады.