ГАЗЕТТЕН ҚОЛ ҮЗБЕЙМІН
Жаңалық пен жақсылық атаулының жаршысы болған аудандық басылым «Тіршілік тынысынан» қол үзген емеспін. Биыл 80 жылдығын атап өткелі тұрған газеттің тарихы көз алдымда өтіп жатыр десем артық айтқандық болмас. Бала кезден бастап жасым ұлғайғанға дейін алдымен пошта жәшігінен аудандық газетті алып, оқуға асығып тұрамын. Ауданның бас басылымы – аудан тарихынан сыр шертетін, жетістігі мен жаңалығын жария ететін газет. Аптасына екі мәрте шығатын газеттің шығарылымы мен мазмұны жаңарып, оқырманын қуантып келеді. Әсіресе, еліміздегі болып жатқан саяси науқан мен мемлекеттік бағдарлама бойынша атқарылып жатқан игі істерді шынайы жеткізіп отырған басылым қаламгерлерінің ізденістеріне ризамын. Танымдық мақалалардан да оқырман өзіне қажетті дүниені тауып, рухани азық алуда. Меніңше, аудандық газет әрбір сырдариялық отбасында болуы тиіс. Оны оқитын оқырман да неғұрлым көп болса, газеттің шығарылымына атсалысып, журналистерге жаңаша серпін беретініміз анық.
Аудан газетіне жазылайық, оқырман!
Құрман Ысқақ,
Ақжарма ауылдық
Қоғамдық кеңес төрағасы
