Жолдау-ел дамуының жаңа кезеңіне бағытталған маңызды бағдар

Мемлекет басшысы Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы еліміздің алдағы даму бағыттарын айқындайтын маңызды стратегиялық құжат деп санаймын. Жолдауда көтерілген бастамалар мемлекеттің экономикалық әлеуетін нығайтуға, әлеуметтік саланы дамытуға және азаматтардың өмір сүру сапасын арттыруға бағытталған. Әсіресе білім беру, денсаулық сақтау, энергетика және инфрақұрылым салаларына басымдық берілуі-уақыт талабынан туындаған маңызды шешімдер.

Менің ойымша, елдің тұрақты дамуы ең алдымен адами капиталға, сапалы білімге және кәсіби мамандардың әлеуетіне тікелей байланысты. Осы тұрғыда педагогтердің мәртебесін арттыру, олардың жұмыс жүктемесін оңтайландыру және артық қағазбастылықтан арылту жөніндегі міндеттер ерекше мәнге ие. Себебі ұстаздың басты мақсаты-білімді, тәрбиелі, отаншыл ұрпақ қалыптастыру. Сонымен қатар ерекше білім беру қажеттіліктері бар балаларға қолайлы орта қалыптастыру бастамасы қоғамдағы тең мүмкіндік пен әлеуметтік жауапкершіліктің айқын көрінісі болып табылады.

Жолдауда айтылған «Халықтық құрылыс» бағдарламасы да елді мекендердің дамуына тың серпін береді деп сенемін. Жаңа мектептер мен медициналық нысандардың салынуы, инженерлік-коммуналдық инфрақұрылымның жаңғыртылуы халықтың тұрмыс сапасын жақсартуға мүмкіндік береді. Әсіресе ауылдық аймақтардың әлеуетін арттыру, тұрғындарға қолайлы жағдай жасау және өңірлердің теңгерімді дамуын қамтамасыз ету-мемлекеттік саясаттың маңызды бағыттарының бірі.

Алайда кез келген реформаның нәтижесі оның сапалы әрі жүйелі жүзеге асуына байланысты. Сондықтан бөлінген қаражаттың тиімді жұмсалуын бақылау, ашықтық пен жауапкершілік қағидаттарын сақтау маңызды. Жолдауда көрініс тапқан «Заң мен тәртіп», адал еңбек және қоғамдық бірлік ұстанымдары да осы мақсаттарға жетудің берік негізі деп білемін. Әрбір азамат өз саласында жауапкершілік танытып, ортақ іске үлес қосқанда ғана көзделген нәтижелерге қол жеткізуге болады.

Жалпы, бұл Жолдау-тек мемлекеттік органдарға арналған міндеттер жиынтығы емес, бүкіл қоғамға ортақ жауапкершілік жүктейтін маңызды құжат. Оның басты құндылығы-елдің болашағын ойлайтын нақты бастамалар мен халықтың әл-ауқатын арттыруға бағытталған мақсаттарында. Ең бастысы, белгіленген міндеттер нақты істермен сабақтасып, әрбір өңір мен әрбір отбасының өмірінен оң өзгерістер табуы тиіс. Елдің ертеңі бүгінгі жауапты шешімдер мен бірлескен еңбектен басталады.