Білімнің шырағданы
Ұстаздық қызмет – ұрпаққа білім беру арқылы баланың бойына адамдық қасиет пен өмірлік ұстаным қалыптастыратын ұлы жол. Әсіресе бастауыш сынып мұғалімінің еңбегі бала өмірінде айрықша орын алады. Өйткені мектеп табалдырығын алғаш аттаған баланың қолына қалам ұстатып, әріп танытып, білім әлеміне жетелейтін де бастауыш сынып ұстазы екені айдан анық. Осы жауапты міндетті абыроймен атқарып келе жатқан тәжірибелі педагогтың қатарында Сәуле Таюпова бар екенін жақсы білеміз. Қашанда жүзі жылы қалпынан таймайтын Сәуле Файзуллақызы осыдан 58 жыл бұрын Тереңөзек кентінде дүниеге келген. Кейіпкерім 21 жасында Қызылорда педагогикалық училищесін тәмамдады. Содан бері №210 О.Әбілпаттаев атындағы орта мектебінде бастауыш сынып мұғалімі ретінде еңбек етуде. Яғни бар ғұмырын бір білім ордасымен, бір мамандықпен байланыстырып, отыз жылдан астам уақыт бойы шәкірт тәрбиесіне өлшеусіз үлес қосты. Ұстаз үшін әр баланың орны бөлек. Әрбірі әртүрлі мінез-құлық танытатыны мәлім. Оқушы алғыр, тұйық, ізденімпаз болуы мүмкін. Ал бастауыш сынып мұғалімінің міндеті – олардың әрқайсысының жүрегіне жол тауып, білімге деген қызығушылығын ояту. Мұндайда Сәуле Файзуллақызы ұстаздық ұстанымын өмір жолының өзегіне айналдыруда.
– Педагогикалық қызмет – мен үшін жүрек қалауымен таңдаған өмірлік жолым. Осы жылдар ішінде талай шәкірттің мектеп табалдырығын алғаш аттап, білім әлеміне қадам басқан сәтінің куәсі болдым. Олардың әрқайсысының бойындағы қабілетті танып, білімге деген қызығушылығын ояту – кәсібиліктің шыңы. Бастауыш сыныпта балаға тек әріп танытып, жазу мен оқуды үйрету жеткіліксіз. Ең маңыздысы, оның бойына адамгершілік, ізгілік, еңбекқорлық сияқты қасиетті сіңіру алдыңғы орында тұрады. Себебі бүгінгі кішкентай шәкірт – ертеңгі ел азаматы. Ұстаздық жолда мені алға жетелейтін күш – шәкірттерімнің жетістігі мен олардың жүрегіндегі ұстазға деген құрметі. Қанша жыл өтсе де, алдымнан өткен шәкірттерімнің амандығын, елге қызмет етіп жүргенін көру – ерекше бақыт. Білім саласында еңбек етіп келе жатқаныма ешқашан өкінген емеспін. Ұстаздық жолды таңдағаныма мақтанамын және бұл мамандықтың абыройын әрдайым биік ұстауға тырысамын, – деді аяулы ұстаз.
Бастауыштағы алғашқы сабақ, алғаш оқылған кітап, жазылған әріп, шығарылған есеп – баланың білім жолындағы алғашқы баспалдағы саналады. Әрбір баспалдақтың берік қалануы көбіне алғашқы ұстаздың еңбегіне байланысты. Ұстаздың әрбір жылы сөзі, әрбір берген тапсырмасы мен әр шәкіртіне жасаған қолдауы баланың өзіне деген сенімін қалыптастырады.
Сәуле Файзуллақызы өзінің кәсіби тәжірибесі арқылы талай шәкірттің білім әлеміне нық қадам басуына жол аша білген жан. Ұстаз үшін ең үлкен жетістік – шәкіртінің сауатты оқып, еркін ойлап, өз ойын жеткізе алатын, ізденуге ұмтылатын азамат болып қалыптасуы. Жылдар өте сол шәкірттерінің әр салада жетістікке жетіп, ел игілігіне қызмет етіп жүргенін көру – ұстаз еңбегінің ең үлкен жемісі.
Ұстаздық жолдағы тәжірибесі мен ізденісі ардақты ұстаздың кәсіби шеберлігін де шыңдай түсті. Өзі жұмыс жасайтын білім ордасында соңғы 9 жылда бастауыш сынып әдістемелік бірлестігінің жетекшісі ретінде әріптестеріне жан-жақты бағыт-бағдар беріп, білім беру ісіндегі тәжірибесімен бөлісуде.
Мұғалімнің еңбегі бір күннің нәтижесімен өлшенбейді. Оның жемісі жылдар өте көрінеді. Бүгінгі кішкентай бүлдіршіннің ертең ел азаматы болып қалыптасуына ықпал ететін де ұстаздың күнделікті маңдай тері.
Еңбең жолында халық баласы үшін жасаған қызметі еленген ұстаз әр жылдары аудан әкімінің және жетекші партияның, облыстық білім басқармасының Алғыс хатымен марапатталған.
Бүгінде тәжірибелі ұстаздың алдынан білім алып шыққан шәкірттерінің қатары қалың. Олардың әр жетістігі – ұстаз еңбегінің жалғасы. Өйткені ұстаз тақта алдында сабақ берумен ғана шектелмейді. Ол баланың бойындағы қабілетті байқайды, сенімін арттырады, арманына қанат бітіреді. Әсіресе бастауыштағы бала үшін мұғалімнің айтқан әр сөзі, көрсеткен әр үлгісі үлкен мәнге ие.
Б.АЯБЕКҰЛЫ
