Мектепке алғашқы қадам
Сыңғырлаған қоңырау үнін алғаш мектеп табалдырығын аттаған 1 сынып оқушылары естіп, ерекше күйге түсері анық. Қыздардың басындағы әдемі ақ бантигі сыныпты гүлдендіріп тұрғандай. Барлығында қазақы нақышты айқындайтын ұлттық ою бейнеленген мектеп формасы. Үстел үстінде алдына келген әр оқушыны сауаттылыққа, әріп тануға үйреткен «Әліппе» оқулығы. Жайдары жүзімен мейірімін төгіп тұрған Сәуле Таюпова – Оспан Әбілпаттаев атындағы №210 орта мектептегі 1 «А» сыныбының сынып жетекшісі. Бүгін сөмке арқалап, білім алуға асыққан балдырғандардың сыныбында алғашқы сабақ өтілді. «Менің Отаным – Қазақстан» атты тақырыпта өрбіген сабақ оқушылардың патроиттық әнімен басталды. Балалығы басылып, оқулыққа қызыға қарап отырған жас өрендер жүректі елжіретеді. Әр бала өз үйінің еркесі. Ал көпшілік ортада өзін-өзі ұстауы мектепте қалыптасады. Сондай-ақ баланың «тұлға» ретінде дамуына ерекше үлес қосатын ол сынып жетекшісі – Сәуле Таюпова. Мерекелік көңіл күймен әр оқушының сабаққа белсене араласуына мүмкіндік беріп отырған жанашыр ұстаз. Бүлдіршіннен «оқушыға» айналған балалар кезек-кезегімен өлең жолдарын мүдірмей айтып шықты. Бұл көрініс жас өрендердің білім алуына деген құштарлығының айқын дәлелі.
Сонымен қатар оқушылардың патриоттық сезімін ояту мақсатында мемлекеттік Рәміздермен таныстыру өтіп, сұрақ-жауап айдары өтті. Балалардың белсенді қатысуы ұстаздың еңбегі екені сөзсіз. Оқушылардың алғашқы сабағына қатысып, бүлдіршіндерді құттықтаған мектеп директоры Света Сақтапова ақ тілегін білдірді.
Гүлсезім ЖАНСЕРІКҚЫЗЫ
