Осыдан 52 жыл бұрын Тереңөзек кентінде дүниеге келген Әбдіразақ Амангелдіұлы мек­тепті аяқтағаннан кейін колледжде білім алып, дәнекерлеуші мамандығын меңгереді. Ол алған кәсіби білімін тәжірибемен ұштас­тырып, еңбек жолын осы мамандықтан бас­таған. 2012 жылдан бері Сырдария ауданының оқшау сумен жабдықтау жүйелерін пайдаланушы өндірістік бөлім­шесінде үздіксіз еңбек етіп келеді. Осы уақыт аралығында өз ісіне деген адалдығы мен жоғары жауапкершілігінің арқасында әріптестері арасында зор беделге ие болып, білікті маман ретінде қалыптасты.

Су жүйесіндегі сан түрлі ақауды дер кезінде анықтап, сапалы жөндеу жұмысын жүргізу – оның күнделікті тәжірибесіне айнал­ған негізгі міндеттің бірі. Әбдіразақ Амангелдіұлының айтуынша, қандай жұмыс болсын, ең бастысы – жауапкершілік пен адал­дық.

– Әр адам өз ісіне немқұрайлы қарамауы керек. Халыққа қызмет ету – үлкен сенім. Сол сенімді ақтау үшін әрдайым тиянақты жұмыс істеу қажет. Қиындығына қарамай, еңбекті жақсы көрсең ғана нәтиже болады. Мен Сырдария ауданының оқшау сумен жабдықтау жүйелерін пайдаланушы өндірістік бөлімшесінде қызмет ете жүріп, саланың қыр-сырына қанықтым. Адалынан еңбек ете білген адам өз еңбегінің жемісін көретіні мәлім. Күнделікті жұмыс барысында әріп­тестеріммен бірге апаттық жағдайлардың алдын аламыз. Әрине, басшылық тарапынан тапсырылған жұмысты ыждағаттылықпен орындап, халыққа сапалы қызмет үлгісін көрсетеміз. Расында, халықты ауызсумен толықтай қамтамасыз ету жолында аянып қалмасымыз анық, – дейді кәсіби маман.

Жалпы алғанда, Әбдіразақ Әлиак­ба­ров­тың еңбек жолындағы басты ерек­шелігінің бірі – оның кез келген уақытта қызметке дайын тұратындығы. Күн демей, түн демей, аяқ астынан орын алған апат кезінде бірінші болып жұмысқа шығып, ақауды қал­пына келтіруге атсалысады. Ауа райының қолай­сыздығына қарамастан, аптап ыстықта да, қақаған аязда да өз міндетін мүлтік­сіз атқарып келеді. Ауызсу құбырында ақау туын­даса, оны дер кезінде жөндеу – үлкен жауап­кер­­шілікті талап ететін жұмыс. Себебі әрбір үйдің тіршілігі, әр­бір отбасының күн­­­делікті қажеті осы жүйе­ге тікелей бай­ланыс­ты. Осындай сәт­­терде уақытпен санаспай еңбек ететін жұ­мысшының еңбегі – шын мәнінде құрметке лайық.

Еңбек еткен адам елеу­сіз қалмайды. Әбдіра­зақ Әлиакбаров та өз еңбегінің нәтижесінде «Жыл үздігі – 2023» номинациясын иеленіп, сан түрлі Алғыс хатпен марапатталған. Бұл – оның кәсібіне шынайы берілгендігінің айқын дәлелі. Отбасында ол – үлгілі әке, ардақты ата. Үш қыз тәрбиелеп өсірген жан бүгінде немере сүйіп отырған бақытты азамат. Жұмыстағы жауапкершілік пен отбасындағы жылылықты қатар алып жүрген оның өмірлік ұстанымы – адал еңбек пен қарапайымдылық.

Қоғамның дамуы – осындай еңбек адамдарымен өлшенеді. Көзге көріне бермейтін, бі­рақ күн­делікті тір­шіліктің ажырамас бөлігіне айналған олардың еңбегі – ел игілігінің негізі. Біздің кейіпкеріміз – Әбдіразақ Аман­гел­діұлы секілді өз ісіне шын берілген маман. Ардақты азамат қандай құрметке болса да лайық екені даусыз. Осындай білікті мамандардың тынымсыз еңбегінің арқа­сында тұрғындар таза ауыз­­­сумен қамтылып, өмір сапасы арта түсуде.