Ақ халатты абзал жан – Айман
Фельдшер қызметі – жауапкершілікті, төзімділікті, жанашырлықты және шұғыл шешім қабылдай білуді талап етеді. Ауыл тұрғындары үшін фельдшер – тек медицина маманы ғана емес, сенімді көмекші әрі денсаулық сақшысы. Науқастарға рухани қолдау көрсетіп, мейірімділік пен жанашырлық танытатын, Жетікөл ауылының бар тұрғынына мейіріммен қарайтын фельдшерлік қызметті абыроймен атқарып жүрген – Айман Шаяева. Ол – өз ісіне жауапкершілікпен қарап, ауыл тұрғындарының денсаулығын нығайту жолында тынымсыз еңбек етіп келеді. Күн-түн демей шақыртуға шығып, әр науқастың жағдайына бей-жай қарамайды.Медицина саласында аянбай еңбек ететін медбике адам денсаулығын сақтауда маңызды рөл атқарады. Науқастарға күтім жасап, жағдайын үнемі бақылап отырады. Жетікөл ауылындағы фельдшерлік жұмысында Айман Шаяева жүкті әйелдер мен балалардың жағдайын қадағалап, профилактикалық жұмыстар атқарады. Бұл қызмет үлкен жауапкершілікті, төзімділікті және халыққа деген жанашырлықты талап етеді. Ауыл фельдшері – ауыл тұрғындарының денсаулығын қорғауда маңызды рөл атқаратын, елге жақын әрі сенімді маман.
Айман Шаяева 36 жыл бұрын Қармақшы ауданына қарасты Ақжар ауылында дүниеге келген. Мектеп жасында-ақ ақ халатты абзал жанды дәрігер болуды армандайды. Мектеп түлегі арманын мақсатқа айналдырып, Қызылорда медициналық колледжінен фельдшерлік мамандықты игеріп шығады. Алғашқы жұмыс орнын Қармақшы ауданындағы «Темір жол» бекетінде медбике қызметінен бастайды.
Бойжеткен Айман өмірлік серігін Амангелді ауылынан кезіктіріп, шаңырақ көтереді. Жұмысын тоқтатпай халыққа көмегін тигізіп қамқорлық көрсете білген Айман 2015 жылдан бастап қазіргі таңға дейін Сырдария ауданына қарасты Жетікөл ауылының медициналық бекетінде фельдшерлік қызметті үздік атқарып келеді.
– Жетікөл ауылында фельдшер болып жұмыс жасап жатқаныма да он жылдан асты. Осы уақытқа дейін қуанышты, кейде қиын сәттер жұмыс барысында көп кездеседі. Соған қарамай алға ұмтыламын. Білімімді шыңдаймын, үйренемін деп өз алдыма мақсат қойғанмын. Үнемі жанымнан табыла білген көмектерін аямайтын Амангелді ауылының дәрігеріне, медбике апайларына алғыс білдіремін. Отбасым менің жұмысымды әрдайым қолдап отырады. Жолдасым Ерсұлтан Қасымов жеке кәсіппен айналысады. Бірге тәрбиелеп, өсіріп отырған Алланың берген 6 бала-шағамыз бар, – дейді ауыл фельдшері.
Осындай жауапты қызметпен қатар, көпбалалы ана болу – үлкен еңбек пен мейірімділікті талап етеді. Көпбалалы ана отбасында тәрбие мен жылулықтың тірегі болып, балаларын ізгілікке, еңбекқорлыққа баулиды. Ол қызмет пен отбасын қатар алып жүріп, сабырлылық пен төзімділіктің үлгісін көрсетеді.
Айман Шаяеваның кәсібіне деген адалдығы мен адамгершілігі көпке үлгі. Ауыл халқы оның біліктілігіне сенім артып, ақыл-кеңесіне жүгінеді. Оның ең басты ұстанымы – әр науқастың денсаулығын жақсартып қана қоймай, оларға үміт сыйлау. Осындай жанашыр жандардың арқасында ауыл медицинасы дамып, халықтың денсаулығы нығая түсуде. Әрбір жанның дертіне дауа болып, үміт отын жағатын ақ халатты абзал жанның еңбегі қашанда құрметке лайық.
Ақтоты ӨТЕПБЕРГЕНОВА
