Жақында бас дәрігер лауазымына тағайын­далған Жанар Жұмабаева бастаған аудандық аурухана ұжымы баспасөзге жазылу науқанында белгіленген межені орындап, басылым оқыр­мандарының санын арттырды. Денсау­лық сақтау саласының мамандары мен қызметкерлері 2026 жылға 409 дана «Тіршілік тынысы» газетіне жазылды. Облыстық «Сыр бойы» газетіне – 135, «Кызылординские вести» газетіне – 14, республикалық «Халық» газетіне 23 дана жазылғанын айта кетейік. Бірқатар республикалық басылымдарға жазылу аудандық аурухана ұжымы тарапынан біздің мекеме арқылы жүзеге асырылып отыр.

– Қай кезде де аудан медицинасының жағымды жа­ңа­лықтарын үздіксіз жариялап отырған аудан­дық газеттің оқырман санын арттыруға барымызды саламыз. Үнемі әріптестік байланыс орнап, ұжымның жұмысын жоғары бағалаймыз. Қалам ұстаған жан – халық пен биліктің арасындағы алтын көпір десек, баспасөз – елдің тынысын аңғартып, қоғамды алға жетелейтін күш екенін жақсы білеміз. Жауапты маман Ұлжан Абдуллаеваның еңбегін ерекше бағалаған жөн. Тапсырылған жұмысты тиянақтылықпен орындап, жоспарға ерекше көңіл бөлді, – деді Жанар Әшімқызы.

Төл басылымға түгел жазылған ұжымның халық денсаулығын жақсартуға бағытталған жобалары ауқымды. Мемлекеттік саясатты жүзеге асыра отырып, аудан медицинасының өркендеуіне, ұлт саулығының сақталуына іргелі ұжым ұтымды қызмет атқара бермек.