Төл басылымның тұрақты оқырманына айналған ақ халатты абзал жандар жылдағы дәстүр бойынша баспасөзге қолдау көрсетуден жаңылған емес. Бірлігі бекем, тірлігі көркем ұжымның мамандары 2025 жылдың 6 айына 386 дана «Тіршілік тынысына», 151 дана «Сыр бойына», 19 дана «Кызылординские вести», 1 дана «Ақмешіт апталығы», 18 дана «Халық», 1 дана «Жалағаш жаршысы» газетіне жазылды. Бұл дегеніміз – 576 оқырманның үйіне басылым барады деген сөз.

Сексен бес жылдық тарихы бар аудандық басылым Сырдария аудандық ауруханасы ұжымымен әрқашан тығыз байланыс орнатып келеді. Тұрақты түрде аудандық аурухана ұжымының сан салаға бөлінген жұмысын ақпараттандыру – бас­ты назарда.

– Қаламгерлер ауданның тыныс-тірші­лігін, шежіресін, қоғамдық-саяси, рухани-мәдени жаңалықтарын бас­па бетінде үнемі жария­лап отырады. Газеттің әр нөмірін асыға күтетін оқырман үшін көптеген құн­ды ақпарат ұсынылады. Баспасөзге жазылу науқанында аудандық аурухана ұжы­мы межелі жоспарды орындауға барын салады. Біздің мекемеде баспасөзге жазылуға салалық орынбасарым Жанар Жұмабаева мен жауап­ты маман Ұлжан Абдуллаева бөлініске сай ұжым мамандарына түсіндірме жасап, толықтай жаздыру­ға ықпал етеді. Берекесі тасыған іргелі ауданның үнжариясына айналған басылымның беделі қай кезде де биік. Басылымның табалдырығы – төр, төрі – тұғыр екенін жақсы білеміз, – дейді бас дәрігер.