Қызылдихандық құрылысшылардың жарқын еңбегі

Жаңалық жерде жатпайды. Қызылдихандық құрылысшылар шаруашылық жұмысшыларына үй салып беріп жатыр деген хабарды естігенбіз. «Үйің болмай, күйің болмайды» деген атам қазақ. Жақсы үрдіс екен деп құптағанбыз. «Мың естігеннен бір көрген артық». Осындай мақсатпен Қызылдихан шаруашылығындағы құрылыс жұмыстарын үйлестіруші Мағауия Асқаров ағамызбен хабарластық. «Іздегенге сұраған» дегендей, Мәкең де қоңырау шалып мән-жайды айтқаннан кейін өзінің жеке көлігімен редакцияға жетіп келді. Сол жерде отырып аз-кем сұхбат құрдық.

– Шаруашылықта құрылыс бригадасы 3 жылдан бері жұмыс жасайды. Бұл игі іске бастамашы болған «Қызылдихан» ШҚ төрағасы Алдаберген Бодыбайұлы Құлбаев. Алдекең істің көзін білетін тәжірибелі басшы. Шаруашылықта егін егумен қатар құрылыс жұмыс­тарын жандандырып, адамдарға қуаныш сыйлауды мақсат тұтқан болу керек, – дейді ол. Иә, айтса айтқандай, шаруашылықта оннан астам құрылысшы келісімді айлық алып, еңбек етеді. Олар – Жомарт Тасберген, Қасым Қожанов, Абзал Сенехан, Ербол Махамбетов, Серік Жұмабаев, Данияр Ысқақов, Алмас Ісқалиев, Яндарбек Абдуллаев, Ғалымбек Самұратұлы, Думан Әбдірұлы, Болатбек Ізтілеуов.

Құрыш қолды құрылысшылар өткен жылы 4 үйді тұрғызып, шаруашылық жұмысшыларының игілігіне пайда­лануға берді. Ол үйлер салынып жатқанда көргенбіз. Заманауи үлгіде тұрғызып, газ, жарық, ауызсу – барлығы шаруашылық есебінен кіргізілді. Бүгінде онда көпбалалы отбасылар, шаруашылық озат­тары тұрып жатыр.

Биылдан бастап шаруашылық жұмысшылары үйдің құрылыс материалдарын өздері сатып алады. Ал жергілікті құрылысшылар үйді тегін салып береді. Мұндай әдіске де сұраныс көп. Нәтижесінде еңбек­керлер үйлі болады. Қазіргі таңда О.Мәлібаев пен Қалжан ахун ауылдарында бірнеше үй осындай әдіс­пен салынуда. Алды пайдалануға берілді. «Қызылдихан» шаруа қожалығы еңбеккерлеріне үй соғып берумен қатар жоғарыда аталған елді мекендерде қайырымдылық шаралар жүргізіп келеді. О.Мәлібаев ауылдық кітапханасына жылу жүйесін жүргізіп, газ кіргізіп берді. Бұған ауыл кітапханашысы Кенжегүл Бодыбаева дән риза.

Қалжан ахун ауылындағы мешіттің асханасын еңселі, жарық етіп тұрғызып берген де осы қызыл­дихандық құрылысшылар. Бұрын жартылай асармен салынған. Оны көрікті әрі жаңа ғимарат етіп аяқтаған шаруашылық құрылысшылары.

Баба ауылында тұратын жеке кәсіпкер, ауыл жанашыры Талғат Пірманов «Қызылдихан» және «БАҚ» шаруа қожалығының Қалжан ахун кесенесіне жасап жатқан жөндеу жұмыстарына ризашылығын білдіреді. Баба ескерткіші толығымен жаңартылған. Намазхандар отыратын орынның төбесіне жөндеу жұмыстары жүргізілген. Кесенеге баратын арық таза­ланып, аяқсу жеткізілген. Және де алдағы уақытта да мұнда жөндеу жұмыстары қос шаруашылықтың көмегімен жасалатын болады.

Шаруашылық есебінен құрылысшыларды ұс­тап тұру оңай емес. Дегенмен халыққа қажетті болған соң, ауылда құрылыс жұмыстарын жандандыру мақса­тында олардың еңбегі қажетке жарап отыр. Құрыш қолды құрылысшылар ауылдың көркіне көрік қосып, ауылдастарының алғысына бөлене беретіні ақиқат.

Ш.БАЛТАБАЙҰЛЫ