Құтты болсын жыл басы туған жерге!

Наурыз мейрамының түркітілдес халықтар, оның ішінде қазақ халқы үшін мәні мен маңызы тереңде. Күннің шуағына малынып, аққа ауыз тиетін, табиғаттың жаңарып, Жер-Ананың бусанатын жаңа күннің бастауы болған көктем айы мерекелерге толы. Ұлыстың ұлы күні жер-жерде кең көлемде аталып өтіледі. «Наурызнама» онкүндігі аясында ауқымды әрі игілігі мол іс-шаралар ұйымдастырылып, халық шат-шадыман күйге бөленеді.

Бір кезде менің әкем Абызбай Маханбетов бас редакторлық еткен аудандық газет тізгіні бүгінде білікті жас мамандардың қолында. Жыл сайын мазмұны мен сапасы кеңіп, оқырманы артып келе жатқан төл басылыммен біз де әркез біргеміз. Аудандық газет арқылы жерлестеріме сағыныш толы ыстық сәлемімді жолдай отырып, жыл басы Наурыз мейрамымен құттықтаймын!

Күн мен түннің теңеліп, жан-дүниені тірілткен, шаруаның бір малы екеу болып, арқа-басы кеңіп, аққа ауыз тиген, қытымыр қыстың ызғарынан құтылып, алдағы шуақты күндерден үміт күттірген әз-Наурыз құтты болсын! Еліміз аман, жұртымыз тыныш болғай! Ауданымыз өркендеп, жастарымыз өсе берсін! Газеттің өзі бір күндік, сөзі мың күндік болып, мәңгі жасай берсін! Әр отбасыға амандық, құт-береке тілеймін! Ақ мол, жыл ырысты болсын! Ұлыс тойы оң болсын!

Ғалым АБЫЗБАЕВ,

газет жанашыры