Жарты ғасыр белесінде
Аудан орталығына іргелес Қалжан ахун ауылдық округінде «Гүлдер» бөбекжай балабақшасы бар. Балабақшаның іргесі осыдан жарты ғасыр бұрын қаланған. Яғни 1974 жылы ашылған балабақшаның алғашқы түлектері бүгінгі таңда ауылда, ауданда, басқа да аймақтарда халықтың қалаулысы болып, ел ертеңі үшін еңбек етуде.Осы орайда бөбекжай балабақша атаулы жылды ерекше форматта атап өтті. «Жарты ғасыр куәсі» және «Еңбекпен зейнетке» тақырыптарын арқау еткен іс-шараға ауыл әкімі Ғ.Әкбаров, балабақша ардагерлері мен қызметкерлері қатысты.
Мерекелік кеште балалардың концерттік бағдарламасы қойылды. Онда бөбекжайдың өнерлі балалары ұлттық аспаптар оркестрінде өнер көрсетті. Сондай-ақ балабақша гимнін, «Торсық» биін билеп көрермендер көзайымына айналды. Одан кейін ауыл келіндері ән айтып, әжелер ансамблі де өз өнерлерін ортаға салды. Іс-шараның алғашқы бөлімінде балабақшада ұзақ жыл жемісті еңбек еткен Мейрамкүл Досжанова мен Күлайым Есекееваны әріптестері зейнет демалысына шығарып салды. Ауыл әкімі зейнет жасына жеткен қос ауылдасын мерейлі жаспен құттықтап, Алғыс хатпен марапаттады. Сондай-ақ зейнет демалысына шыққан қос ардагерге аудандық кәсіподақ комитетінің құттықтау хаты мен бағалы сыйлығы табысталды.
– «Гүлдер» бөбекжай балабақшасы жарты ғасырлық мерейтойын атап өтуде. Осынша уақыт аралығында небір ұрпақты тәрбиелеуге үлес қосқан балабақша 1986 жылдан бастап жаңаша кейіп алғанын айта кету орынды. Балабақша 2018 жылдан бастап бөбекжай болып қайта құрылды. Соңғы төрт жылдан бері мұнда ауылдың 70 бүлдіршіні мектепке дейінгі біліммен және тәрбиемен қамтылуда. Бала тәрбиелеу ісіндегі елеулі еңбектеріңізге алғыс білдіреміз. Бейнеттеріңіздің лайықты жемісін көре беріңіздер, – деген ауыл әкімі Ғ.Әкбаров ардагерлер мен балабақша ұжымын құттықтады.
– «Гүлдер» бөбекжай балабақшасында балалар жас ерекшелігіне сай 3 топқа бөлінеді. Ұжымдағы 12 педагогтың 5-еуі педагог-сарапшы, 5-еуі педагог-модератор біліктілігін алған. Мамандар мектепке дейінгі тәрбие мен оқытудың мемлекеттік жалпыға міндетті стандартына және мектепке тәрбие мен оқытудың үлгілік оқу бағдарламасын іске асырады. Осындай білікті мамандардың жемісті еңбегінің нәтижесінде балабақшамыз елу жылдан бері халыққа қызмет етіп келеді. Бүгінде алғашқы түлектерімізбен мақтанамыз. Атап айтар болсақ, бүгінгі кештің жоғары деңгейде өтуіне де «БАҚ» шаруа қожалығының төрағасы Серік Әбжалиев, балабақшаның ең алғашқы меңгерушісі Төлен Әнуарқызының ұлы Талғат Пірманов демеушілік жасап отыр. Құрметті зейнет демалысына шыққан әріптестерімізге құтты болсын айтып, іс-шараның жоғары деңгейде өтуіне атсалысқан азаматтарға алғыс білдіреміз, – дейді балабақша меңгерушісі Ж.Байназарова.
А.МҰХАНБЕТҚАЛИ
