Қазіргі таңда ауданға қарасты Қалжан ахун ауылындағы №126 орта мектепте жұмыс жасап келеді. Қос ұстаз – Тереңөзектің тумалары. Айбек Тәжібаев дене шынықтыру пәнінің мұғалімі болса, Эльмира Жорабекқызы математика пәнінен сабақ береді. Ауыл балаларының сапалы білім алуына үлес қосып келе жатқан білікті мамандар жарасымды жұп қана емес, үлгілі отбасы.

– Жолдасым екеуіміз бала кезден бір-бірімізді танитын едік. Әрі бір мектепте оқыдық. Ата-аналарымыз да құрдас болды. Бір-бірімізбен жұмысқа орналасқаннан кейін жақынырақ танысып, отбасын құрған болатынбыз. Қай кезде де қандай қиындық болса да бірге жеңуге, қуанышты күндерді бірге өткізуге серттестік. Үйдегі анамызда бізге өз ақылын айтып, бүгінде ақылшымыз болып отыр. Махаббатымыздың жемісі үш баламыз, – дейді берекелі шаңырақтың отанасы.

Бір салада табысты да жемісті еңбек етіп келе жатқан ұстаздар адал еңбегімен дараланып, ізденімпаздығы мен ұйымдастырушылық қабілетімен білікті маман ретінде мектеп абыройын асқақтатып келеді.

Айбек Нұрымұлы қызмет етіп келе жатқан 15 жыл ішінде спорттық сайыстардан жүлдемен оралып жүр. Атап айтқанда, Қарағанды, Ақтау қаласында өткізілген көпсайыстан ҚР кубогының күміс жүлдегері, Петропавл қаласында өткізілген көпсайыстан ҚР кубогы­ның жеңімпазы атанды. Мұнан бөлек облыстық «Алтын күз» спартакиадасында үстел теннисінен ІІІ орын иеленді. Сонымен қатар, облыстық білім бақармасының Алғыс хатымен марапатталды. Ал, Эльмира Жорабекқызының математика пәнінен беріп келе жатқанына 14 жыл. Осы жыл аралығында «Дарын» білім беру орталы­ғының Алғыс хатымен, шығармашыл мұғалімдердің аудандық тәжірибе алаңы аясында «Брейн-ринг» сайысында жеңімпаз атанған. Бұдан бөлек аудандық «Үздік математика пәні мұға­лімі» байқауында ІІІ орын иегері.

«Ұстазы жақсының ұстамы жақсы» де­мек­ші, бүгінде шәкірттері ұстаздарының еңбе­гін ақтап олимпиадаларда, түрлі сайыс­­тарда бақ сынап, жетістіктерге жетіп жүр. Ұлағатты ұстаз Хадиша Маханбетованы еске алуға арналған волей­болдан аудандық турнирде Айбек Тәжібаев­тың оқушылары жеңімпаз атанды. Математи­каның қыр-сырын жетік меңгерген Эльмира Жорабекқызының шәкірттері 2022 жылы Думан Әнешов пен Талшын Төребекова ауыл балаларына арналған «Мың бала» ұлт­тық олимпиадасының жеңімпазы атанды. Думан Әнешов Алматы облысындағы Ш.Смағұлов атындағы мамандандырылған дарынды балаларға арнал­ған физика-математика мектебіне оқуға жолдама алған болатын. 2023 жы­лы Нұрбибі Жетпісбаева аудандық «Алтын сақа» олимпиадасының жеңімпазы атанса, Нұрали Сайлаубайұлы математика пәнінен аудандық олимпиададан ІІІ орын алды.

Өмірі мен қызметін бір арнаға тоғыс­тырған жарасымды жұптың оқу­шылары ғана емес, балалары да оқуда озат. Үлкен қызы Інжу Нұрым ауыл балаларына арналған «Мың бала» олимпиадасының жеңімпазы атанып, Қызылорда қаласын­дағы Білім инновация лицейіне оқуға қа­былданды. Олимпиадаға анасы өзі дайындаған екен. Сонымен қатар, Інжу аудан­ның атынан волейболдан жарыс­тарға қатысып жүр. Ал екінші ұлы Нұржігіт болса былтырғы оқу жылында математика пәнінен олимпиада жеңімпазы. Ал үшінші ұлы Бақдаулет биыл 1 сыныпқа барады. Қызмет­те де отбасында да тек адалдықты ту еткен қос ұстаздың шаңырағына тек қана бақыт тілейміз.